डोल्पा,८ असोज । डोल्पाको जुफाल विमानस्थलमा सीता एयरको जहाज अवतरण गरेर पार्किङतर्फ जाने क्रममा पछाडिको दाहिने भागको एउटा चक्का छुट्टिएको छ।
बिहीबार बिहान नेपालगन्जबाट ७ विदेशी र ६ नेपाली गरी १३ यात्रु लिएर जुफाल पुगेको जहाज बिहान ८ः२५ बजे अवतरण गरेको थियो। पार्किङ एरियातर्फ अघि बढ्ने क्रममा जहाजको पछाडिको दाहिनेतर्फको एउटा चक्का छुट्टिएर बाहिर निस्किएको हो।
चक्का छुट्टिँदा जहाजको सन्तुलन बिग्रिने तथा ल्यान्डिङ गियरसहित अन्य संरचनामा क्षति पुग्न सक्ने जोखिम भए पनि घटना हुँदा जहाजको गति निकै कम भइसकेकाले ठूलो दुर्घटना हुन पाएन।
सीता एयरका डोल्पा स्टेसन म्यानेजर मुकुन्द पौडेलका अनुसार चक्का छुट्टिएको थाहा पाएलगत्तै चालक दलले इन्जिन बन्द गरेका थिए।
‘चक्का उछिट्टिँदा विमानको सन्तुलन खलबलिन सक्ने वा अन्य जोखिम निम्तिन सक्छ। तर चक्का छुट्टिएको आभास हुनासाथ पाइलटले तत्काल निर्णय लिएर इन्जिन अफ गर्नुभएको थियो,’ पौडेलले भने।
यद्यपि, इन्जिन बन्द गरेकै कारण ठूलो दुर्घटना टरेको भन्ने निष्कर्ष भने अहिले नै निकाल्न नमिल्ने उनको भनाइ छ। चक्का किन छुट्टियो र त्यसले जहाजमा कस्तो प्रभाव पारेको थियो भन्ने कुरा प्राविधिक जाँचपछि मात्रै यकिन हुनेछ।
धावनमार्गमै भएको भए जोखिम बढ्न सक्थ्यो
जुफाल विमानस्थलका कार्यालय प्रमुख राहुल मिश्रका अनुसार चक्का अवतरण गर्नेबित्तिकै वा धावनमार्गको सुरुआती भागमै छुट्टिएको भए अवस्था गम्भीर हुन सक्थ्यो।
‘जहाज अवतरण गर्नबित्तिकै वा धावनमार्गको सुरुमै चक्का छुट्टिएको भए ठूलो दुर्घटनाको खतरा हुन सक्थ्यो,’ मिश्रले भने, ‘तर स्पिड कम भइसकेको समयमा घटना भएकाले ठूलो जोखिम भएन।’
चक्का छुट्टिँदैमा जहाज दुर्घटनामा पर्ने निश्चित हुँदैन। जोखिमको स्तर जहाजको गति, चक्का छुट्टिएको समय, बाँकी ल्यान्डिङ गियरको अवस्था तथा जहाजको अन्य संरचनामा परेको प्रभावमा निर्भर गर्छ।
जुफालको घटनामा भने जहाज पार्किङतर्फ अघि बढिरहेको र गति निकै कम भइसकेको अवस्थामा चक्का छुट्टिएको बताइएको छ।
दोस्रो उडानमै समस्या
जहाजका क्याप्टेन सञ्जीव कँवर र डा. एपी प्रधान पाइलट थिए। स्टेसन म्यानेजर पौडेलका अनुसार चालक दलले सोही जहाजबाट बिहान ६ बजे पहिलो उडान गरेका थिए। जुफालतर्फको उडान उनीहरूको दोस्रो उडान थियो।
जहाजमा रहेका १३ यात्रु र चालक दलका सबै सदस्य सकुशल छन्।
घटनापछि जहाजको प्राविधिक जाँच तथा थप अनुसन्धान हुने भएको छ। चक्का छुट्टिनुको वास्तविक कारण, ल्यान्डिङ गियरमा भएको सम्भावित क्षति र घटनाको प्राविधिक अवस्था इन्जिनियरको परीक्षणपछि मात्रै खुल्नेछ।
