झापा, असोज १३। भूमि समस्या समाधान आयोग, जिल्ला समिति झापाले बुद्धशान्ति गाउँपालिका वडा नम्बर ४ स्थित शान्तिनगरका २६ अव्यवस्थित बसोबासी तथा परिवारलाई औपचारिक रूपमा लालपुर्जा वितरण गरेको छ।
भूमि समस्या समाधान समितिका अध्यक्ष तथा प्रमुख जिल्ला अधिकारी श्रवणकुमार पोखरेल र बुद्धशान्ति गाउँपालिकाका अध्यक्ष मनोज प्रसाईंले संयुक्त रूपमा लाभग्राहीलाई लालपुर्जा हस्तान्तरण गर्नुभएको हो। वितरण गरिएको लालपुर्जा अन्तर्गत कुल १ बिघा ६ कट्ठा ६ धुर जमिन औपचारिक रूपमा बसोबासीको नाममा कायम गरिएको छ।
प्रमुख जिल्ला अधिकारी पोखरेलले सरकारले भूमिहीन दलित तथा भूमिहीन सुकुम्बासीलाई लालपुर्जा वितरणलाई प्राथमिकतामा राखेको बताउनु भयो।
उहाँका अनुसार बुद्धशान्ति गाउँपालिकामा भूमिहीन दलित परिवार ३९ र भूमिहीन सुकुम्बासी परिवार १४८ रहेकोमा प्रमाणीकरणको कार्य अघि बढिरहेको छ।
उहाँले पहिलो चरणमा अव्यवस्थित बसोबासीलाई मात्रै लालपुर्जा वितरण गरिएको जानकारी दिनुभयो।
भूमिहीन दलित तथा सुकुम्बासीको प्रमाणीकरणको सम्पूर्ण प्रक्रिया पूरा भएपछि उनीहरूलाई समेत लालपुर्जा वितरण गरिने जिल्ला समितिले जनाएको छ।
