विर्तामोड ,१४ असोज। प्रसारण लाइनमा प्राविधिक काम गर्नुपर्ने भएपछि नेपाल विद्युत् प्राधिकरणले झापासहित कोशी प्रदेशका विभिन्न जिल्लामा दुई दिन दैनिक आठ घण्टा विद्युत् आपूर्ति बन्द गर्ने भएको छ।
प्राधिकरणको केरौन १३२र३३ केभी सबस्टेशन आयोजनाले दुहबी–दमक १३२ केभी प्रसारण लाइनमा ‘लूप इन लूप आउट’ (एलआईएलओ) कार्य गर्नुपर्ने भएकाले विद्युत् सेवा बन्द गर्न लागिएको हो।
प्राधिकरणका अनुसार २०८३ असोज १७ गते शनिबार र १८ गते आइतबार बिहान ४ बजेदेखि दिउँसो १२ बजेसम्म विद्युत् आपूर्ति बन्द हुनेछ। दुवै दिन आठ–आठ घण्टा विद्युत् सेवा अवरुद्ध हुने जनाइएको छ।
विद्युत् कटौतीबाट झापा, इलाम, पाँचथर र ताप्लेजुङका सबै क्षेत्रमा असर पर्नेछ। त्यस्तै, मोरङको उर्लाबारी, पथरीलगायत आसपासका क्षेत्रमा पनि विद्युत् सेवा अवरुद्ध हुने प्राधिकरणले जनाएको छ।
निर्धारित समयभन्दा अगावै प्राविधिक काम सम्पन्न भएमा विद्युत् सेवा सोहीअनुसार छिट्टै सञ्चालनमा ल्याइने प्राधिकरणले जनाएको छ। विद्युत् आपूर्ति बन्द हुँदा ग्राहकमा पर्न जाने असुविधाप्रति क्षमा माग्दै प्राधिकरणले काम सम्पन्न गर्न सहयोग तथा धैर्यधारण गरिदिन उपभोक्तालाई आग्रह गरेको छ।
