झापा, १२ कात्तिक । झापाको दमकमा बसको ठक्करबाट गम्भीर घाइते भएका एक मोटरसाइकल चालकको उपचारका क्रममा मृत्यु भएको छ।मृत्यु हुनेमा पाँचथरको मेमेङ गाउँपालिका–९ घर भई हाल मोरङको लेटाङ–८ बस्ने अन्दाजी ५४ वर्षीय मंगलप्रसाद साउदेन रहनु् भएको छ। पूर्व–पश्चिम राजमार्गअन्तर्गत दमक नगरपालिका–५ स्थित बजाज शोरुम अगाडि बुधबार साँझ करिब ४ ः ४५ बजे दुर्घटना भएको हो। लेटाङबाट दमकतर्फ आउँदै गरेको प्र १–०२–०५३ प ७४३९ नम्बरको मोटरसाइकललाई प्र १–०१–००१ ख ४२९२ नम्बरको यात्रुवाहक बसले ठक्कर दिएको थियो।
दुर्घटनामा छातीमा भित्री चोट लागेका साउदेनलाई तत्काल स्थानीय निम्स अस्पताल दमक पुर्याइएको थियो। त्यहाँ प्राथमिक उपचारपछि थप उपचारका लागि साँझ ५ : १० बजे विराटनगरस्थित विराट टिचिङ अस्पताल पठाइएकोमा उपचारकै क्रममा साँझ ६ : ५५ बजे चिकित्सकले उहाँलाई मृत घोषणा गरेको जिल्ला ट्राफिक प्रहरी कार्यालय झापाले जनाएको छ।
दुर्घटनाग्रस्त मोटरसाइकललाई इलाका प्रहरी कार्यालय दमकले नियन्त्रणमा लिएको छ। बसमा यात्रु सवार रहेकाले चालक मेचीनगर–७ बस्ने ४६ वर्षीय देवीप्रसाद ओलीलाई गन्तव्यतर्फ जान दिइए पनि बसको सम्पूर्ण कागजात ट्राफिक प्रहरीले नियन्त्रणमा राखेको जनाइएको छ।
