दमक,१२ कार्तीक । झापाको दमक क्षेत्रमा साविकमा लालपुर्जा प्राप्त गरेका २३२ जना जग्गाधनीको जग्गासम्बन्धी विवरण सच्याएर लालपुर्जा कार्यान्वयनमा ल्याउने प्रक्रिया अघि बढाइएको छ।जिल्ला भूमि समस्या समाधान समितिले दोहोरो स्वामित्वको समस्या देखिएका जग्गाधनीको नामावली सार्वजनिक गरेको हो। झापाका प्रमुख जिल्ला अधिकारी श्रवणकुमार पोखरेलका अनुसार दमक नगरपालिका मार्फत सम्बन्धित जग्गाधनीको विवरण सार्वजनिक गरिएको छ।पोखरेलका अनुसार विगतमा सुकुम्बासी समस्या समाधानका लागि गठित आयोगबाट लालपुर्जा वितरण गरिए पनि मालपोत कार्यालयमा रहेको जग्गाको स्रोत अभिलेखमा नेपाल सरकारकै नाम कायम रहेकाले ती पुर्जा कार्यान्वयनमा आउन सकेका थिएनन्।
व्यक्तिका नाममा लालपुर्जा जारी भए पनि मालपोतको अभिलेखमा जग्गा नेपाल सरकारकै नाममा कायम रहँदा स्वामित्व सम्बन्धी दोहोरो अभिलेखको समस्या देखिएको हो। सोही समस्या समाधान गर्न सम्बन्धित जग्गाधनीको विवरण सच्याएर लालपुर्जा कार्यान्वयनमा ल्याउने तयारी गरिएको प्रमुख जिल्ला अधिकारी पोखरेलले जानकारी दिनुभयो।उहाँका अनुसार विवरण सच्याउने काम सम्पन्न भएमा साविकमा लालपुर्जा प्राप्त गरेका २३२ जना जग्गाधनीको पुर्जा कार्यान्वयनमा आउनेछ।सम्बन्धित जग्गाधनीको विवरण सच्याउने प्रक्रिया पूरा भएपछि उनीहरूले विगतमा प्राप्त गरेको लालपुर्जाका आधारमा जग्गाको स्वामित्वसम्बन्धी समस्या समाधान हुने अपेक्षा गरिएको छ।
