दमक, २२ कात्तिक। दमकबाट इलाम हुँदै पाँचथर र ताप्लेजुङसम्म जोड्ने दमक–रवि–चिसापानी सडक निर्माणका लागि नयाँ ठेक्का लागेको छ। करिब २ अर्ब रुपैयाँमा नयाँ ठेक्का लागेसँगै यो सडक निर्माण र बजेट विनियोजनको सन्दर्भमा विभिन्न दल तथा व्यक्तिहरूले जस लिने गरी सामाजिक सञ्जालमा समेत प्रचार गरिरहेका छन्।सत्तारूढ दल रास्वपाका नेता तथा कार्यकर्ताहरूले बालेन सरकारको जयजयकार गरिरहेका छन् भने नेकपाका नेता घनश्याम भुसाल लगायत इलामका स्थानीय नेताहरूले केपी ओली प्रधानमन्त्री भएकै पालाको बजेट आएको भन्दै जस लिने प्रतिस्पर्धा गरिरहेका छन्।
यस्तो दोहोरी सामाजिक सञ्जालमा देखिएपछि इलामको माङसेबुङ स्थित लारुम्बाका धर्मगुरु आत्मानन्द लिङ्देनको सचिवालयले पनि आफ्नो दाबीसहित पत्रकार सम्मेलन गरेको छ।आइतबार दमकमा पत्रकार सम्मेलन गर्दै सचिवालयले सडकको परिकल्पनादेखि अहिलेसम्मको अवस्थासम्ममा सबैभन्दा बढी योगदान धर्मगुरुकै रहेको दाबी गरेको छ।किरात धर्मगुरुका प्रवक्ता डिल्लीराम चाम्लिङले सडक निर्माणका लागि प्रधानमन्त्री बालेन शाहलाई आफ्नै आश्रममा बोलाएर धर्मगुरुले अनुरोध गरेपछि मात्रै करिब २ अर्ब रुपैयाँ बजेट विनियोजन भई ठेक्का स्वीकृत भएको र निर्माण कम्पनीसमेत छनोट भएको तर्क गर्नुभयो।
उहाँले यो सडकमा हरेक पटक सरकारले बजेट छुट्याउँदा दमक–रवि–चिसापानी सडक भनेर छुट्याइएकोमा समेत आपत्ति जनाउनुभयो। यसअघि पनि यस्तै भएको र अहिले पनि दोहोरिएको उहाँको भनाइ थियो। २०५५ सालमा तत्कालीन प्रधानमन्त्री गिरिजाप्रसाद कोइरालाको पालामा फाल्गुनन्द मार्ग नामकरण गरिएको सडकको पटक–पटक नाम परिवर्तन हुँदै आएकोमा उहाँले असन्तुष्टि जनाउनुभयो।त्यस्तै, पत्रकार सम्मेलनमा किरात धर्म साहित्य उत्थान संघका अध्यक्ष डा. डकेन्द्र थेगिमले सडक निर्माण समयमै सम्पन्न गराउन छुट्टै संयन्त्र आवश्यक रहेको बताउनुभयो। त्यसलाई पहिचान गरी अब नागरिक तहबाटै खबरदारी र बहिष्कार गर्नुपर्ने चेतावनीसमेत दिनुभयो।
किरात धर्मगुरुको धाम जाने सडकमा भइरहेको फोहोरी राजनीतिका कारण निर्माण कार्य समयमै सम्पन्न नहुने आशंका व्यक्त गर्दै उहाँले स्थानीय तहका जनप्रतिनिधिहरू समेत यस्ता गतिविधिमा संलग्न रहेको आरोप लगाउनुभयो। अब त्यस्तो प्रवृत्ति त्यागेर समयमै सडक निर्माण सम्पन्न गर्न सबै पक्ष सकारात्मक बन्नुपर्ने उहाँको धारणा थियो।पत्रकार सम्मेलनमा २०४३ सालमा तत्कालीन राजा वीरेन्द्र शाह धनकुटा सवारी भएका बेला धर्मगुरुले यो सडक निर्माणका लागि बिन्तीपत्र चढाएको प्रसङ्गसमेत उठाइएको थियो। सडकको सुरुवातदेखि अहिलेसम्म धर्मगुरुकै योगदान र भूमिका रहेको दाबी गर्दै यसको जस अरू कसैले नलिनसमेत पत्रकार सम्मेलनमार्फत अनुरोध गरिएको छ।
