बिराटनगर/
विराटनगर-इटहरी-धरान खण्डको छ लेन सडक निर्माण सम्पन्न नहुँदै भत्किन थालेको छ । विराटनगरको रानी खण्डको तीन किलोमिटर सडक भासिएर भत्किन थालेका हो । ‘अस्पाल्ट’ प्रविधिको कालोपत्रे भनिएपनि सडक भत्किन थालेपछि विराटनगरको रानी सडक खण्डमा अहिले एकतर्फी सवारी आवागमन हुँदै आएको छ ।
छ लेन सडक निर्माणको काम १७ वटा खण्डमा वर्गीकरण गरी विभिन्न ठेकेदार कम्पनीले सडक विस्तारका काम गदै आएका छन् । रानीदेखि धरानसम्मको सडक बिस्तारको काम उत्तर-दक्षिण व्यापारिक मार्ग विस्तार आयोजनाले गर्दै आएको छ । सडक निर्माणमा कमसल सामग्री प्रयोग गरिएकाले निर्माणाधीन सडक निर्माण सम्पन्न नहुँदै भासिएको अनुमान छ ।
छ लेन सडकको भारवहन क्षमता २० टन मात्र छ । भारतबाट औद्योगिक कच्चा पदार्थ बोकेर नेपाल आएका ३० टनसम्म भार बोकेका लहरी लगायतका ढुवानीका साधन गुड्दा रानी सडक खण्ड भासिन पुगेको पनि स्थानियको अनुमान छ ।
आशिष निर्माण कम्पनीले पनि भारतबाट ठूला मालबाहक सवारी साधन औद्योगिक नगरी विराटनगर प्रवेश गर्दा सडकले थेग्न नसकेका कारण सडक भासिन पुगेको बताउँदै आएको छ । विराटनगरको रानीदेखि धरानको तीनकुनेसम्म ४९ किलेमीटर सडक छ लेनमा बिस्तार गर्ने काम अहिले पनि जारी छ ।
संघीय सरकारले १० अर्ब ९८ करोड रुपैयाँको लागतमा २०६९/७० देखि छ लेन सडक बिस्तारको काम सुरु गरेको थियो । रानीदेखि सुनसरीको तरहरासम्म ३४ किलोमिटरमध्ये ३२ किलोमिटर क्षेत्रमा कालोपत्रको काम सकिएको छ । दुहवीको दुई किमि क्षेत्रमा कामको सुरुवात नै हुन सकेको छैन ।
यो खण्डमा विभिन्न १७ वटा निर्माण कम्पनीले काम गरेका छन् । सडकको बीच भागमा डिभाइडर राखेर दायाँ-बायाँ ३/३ लेनमा विभाजन गरिएको छ ।
