दमक, मंसिर १०
‘हामी सबैको प्रतिबद्धता लैङ्गिक हिंसा अन्त्यका लागि ऐक्यबद्धता’ भन्ने राष्ट्रिय नाराका साथ ३३ औँ अन्तर्राष्ट्रिय लैंगिक हिंसा विरुद्धको १६ दिने अभियान आजबाट सुरु भएको छ । जस अन्तर्गत दमक नगरपालिका कार्यालयको आयोजनामा विभिन्न संघ संस्था तथा सरोकारवालाहरु सहभागि र्यालीले दमक चोक परिक्रमा गरेको छ ।
लैङ्गिक रूपमा हुने हिंसा नियन्त्रणको लागि विश्वव्यापी अभियानको रूपमा लिइने यो दिवसको सार्थकताका लागि सरोकारवालाहरुले सबैको सहकार्यमा लैगिक हिंसा अन्त्य गर्न जुट्नु पर्ने धारणा राखेका छन् । र्यालीपछि दमक नगरपालिका कार्यालय परिसरमा सभाको आयोजना गरिएको थियो ।
मंसिर १० देखि सुरु भएर मंसिर २५ अर्थात् नोभेम्बर २५ देखि डिसेम्बर १० सम्म मनाइने यो दिवसको १६ दिने अभियानमा दमकका १० वटै वडामा सचेतनामूलक १८ वटा कार्यक्रम राखिएको जनाउँदै नगर प्रमुख रामकुमार थापाले लिंगका आधारमा कसैमाथि पनि हिंसा हुन नहुने धारणा राख्नु भयो ।
नगर उपप्रमुख रेगिना भट्टराई प्रसाईंले सभामा जानकारी गराउनु भयो । उहाँले कुनै पनि आधारमा नगरवासी हिंसा पर्न नहुने कुराको सचेतनाका लागि नगरपालिकाले कार्यक्रम तय गरिएको जनाउँदै हिंसाको अन्त्य आआफ्नो घरबाट हुनुपर्नेमा जोड दिनु भयो ।
कार्यक्रममा बोल्दै राजनीतिमा सक्रिय महिला नेतृ लीला दाहाल ढुंगेलले लैंगिक हिंसाभित्र मुख्य रुपमा महिला हिंसा हुने गरेको जनाउनु भयो । महिलाहरु घरेलु र राजनीतिक हिंसाको समेत शिकार भएको जनाउँदै यसखाले हिंसा अन्त्यका लागि सबैको सहकार्य आवश्यक रहेको टिप्पणी गर्नुभयो ।
कार्यक्रममा शुभकामना मन्तव्यका क्रममा नारी विकास संघकी अध्यक्ष रीता थापाले ज्येष्ठ जिउँदा भगवानका रुपमा रहेका ज्येष्ठ नागरिकहरुमाथि पछिल्ला समयमा हिंसा हुने गरेको उल्लेख गर्दै उहाँहरुको उचित संरक्षण र सम्मान आवश्यक रहेको कुरामा जोड दिनु भयो ।
सो अवसरमा अर्की महिला नेतृ भूमिका कोइरालाले सामाजिक रुपमा महिलाहरुमाथि विभेद हट्न नसकेको अवस्थामा राजनीतिक रुपमा समेत महिला सहभागितालाई कमजोर बनाएर विभेद हुने गरेको धारणा राख्नु भयो । उहाँले पालिकाहरु वडाध्यक्ष महिलालाई समेत बनाउन वातावरण तय गर्नु पर्ने विचार राख्नु भयो ।
नगरको सामाजिक विकास समिति संयोजक सारदा भट्टराईको अध्यक्षताको कार्यक्रममा सहकारी अभियन्ता चन्द्रा भट्टराई लगायतले समेत महिला हिंसा अन्त्यको आवाज उठाउनु भयो । सो अवसरमा महिला समूहले पञ्चेबाजा प्रस्तुत गरेर आफ्ना सृजनशीलता प्रस्तुत गरेको थियो । कार्यक्रम अन्तर्गत दमक चोकमा आज साँझ ५ बजे दिपप्रज्वलन समेत गरिने छ ।
महिला बालबालिका तथा ज्येष्ठ नागरिक मन्त्रालयले ‘हामी सबैको प्रतिबद्धता लैङ्गिक हिंसा अन्त्यका लागि ऐक्यबद्धता’ लैङ्गिक हिंसा विरुद्धको अभियानको राष्ट्रिय नारा तय गरेको छ भनें अन्तर्राष्ट्रिय नारा भने ‘बेइजिङ घोषणापत्र र कार्यान्वयनको ३० वर्षः महिला विरुद्धको हिंसा अन्त्यका लागि एकजुट बनौँ’ भन्ने रहेको छ ।
सन् १९९१ मा महिलाहरूको विश्वव्यापी नेतृत्व संस्थानले यस अभियानको आयोजना गरेको थियो । विश्वका १८७ देशहरूले यो अभियान सञ्चालन गर्दै आएका छन् । महिला विरुद्धको हिंसा उन्मुलनको अन्तर्राष्ट्रिय दिवस (नोभेम्बर २५) मा सुरु भई अन्तर्राष्ट्रिय मानव अधिकार दिवस (डिसेम्बर १०) का दिन १६ दिने अभियान समापन हुने गरेको छ ।
