सिलिगुडी, माघ १३
भारतको पश्चिमबंगालस्थित सिलीगुडीको ढुकुरीय पत्थरघटा मतिगरामा रहेर शिक्षा क्षेत्रमा चर्चित मयूर स्कुलले आफूले समेत सृजनशील गतिविधिका कार्यक्रम गर्दै आएको अवस्थामा सो स्कुलमा यो पटक नवौं पश्चिमबंगाल किक बक्सिङ च्याम्पियनशीप २०२५ सम्पन्न भएको छ ।
युवा तथा खेलकुद मन्त्रालयको वाको इन्डिया किक बक्सिङ फेडेरेशन अन्तर्गत पश्चिमबंगाल स्पोर्ट्स किक बक्सिङ एशोसियसनले कार्यक्रमको आयोजना गरेको थियो ।
एसएसबी सीमा मुख्यालय सिलिगुडीका महानिरीक्षक सुधीर कुमारको प्रमुख आतिथ्यतामा सम्पन्न कार्यक्रममा अम्बेडकर एकाडेमीमा निर्देशक विष्णु गोले, नारायण स्कुलका प्रिन्सिपल पंकज झासहितको विशेष आतिथ्यता रहेको थियो ।
पश्चिमबंगाल स्पोर्ट्स किक बक्सिङ एशोसियसनका अध्यक्ष गोपाल लामाको अध्यक्षताको कार्यक्रममा महासचिव विश्वनाथ रोयले एशोसियसनका तर्फबाट गतिविधि प्रस्तुत गर्नुभएको मयूर स्कुलकी पब्लिक रिलेसन अफिसर एवम् सर्जक कृतिका दाहालले जनाउनु भयो । दाहालले पश्चिमबंगालका दर्जनौं विद्यालयका विद्यार्थीहरु प्रतियोगितामा सामेल भई पुरस्कार हात पारेको उल्लेख गर्नुभयो । प्रतियोगिताले विद्यार्थीहरुलाई खेलप्रति उत्साहित बनाएको पाइएको छ ।
