दमक, माघ ३०
झापाको दमक ६ नम्बर वडा कार्यालयले गीतसंगीतप्रतिको सम्भावनालाई खोज्न आयोजना गरेको ३० दिने वाद्यवादन तालिम उत्साहपूर्वक रुपमा सम्पन्न भएको छ ।
तालिम समापन कार्यक्रममा बोल्दै कार्यक्रममा अध्यक्ष एवम् वडाअध्यक्ष टेकबहादुर थापाले सिकेको सीपलाई व्यवहारिक बनाउने कुरामा वडाको जोड रहेको जनाउनु भयो ।
हार्मोनियम र मादल वादन सम्बन्धिको सो तालिमको समापनका अवसरमा प्रशिक्षार्थी लक्ष्मीप्रसाद दाहाल र अम्बिका आचार्यले तालिमबाट वाद्य वादन सिक्न पाएकोमा खुसी व्यक्त गर्नुभयो । दाहाल र आचार्यसहितका सहभागिले तालिमबाट उत्साह जागेको बताएका थिए । तालिमका सहभागिलाई प्रमाणपत्र वितरण गरिएको छ ।
पुस २१ गतेबाट सुरु भएको तालिममा संगीत शिक्षक चन्द्रकुमारी गड्तौलाले सहजीकरण गर्नुभएको थियो । वडाको सीप प्रवद्र्धन शिर्षकमा १ लाखको बजेटमार्फतको तालिममा १३ महिला र ५ पुरुष गरी १८ जनाको सहभागिता रहेको थियो ।
