दमक, फागुन ११
अस्ट्रेलियाको सिड्नीमा देशभक्तिपूर्ण चलचित्र ‘काँडेतार’ विशेष प्रदर्शन गरिएको छ । शनिवार सिभिक थिएटरमा चलचित्र प्रदर्शन हुँदा बाक्लो उपस्थितीमा नेपालीभाषी दर्शकले चलचित्र रुचाएका थिए । उनीहरुले विदेशमा रहेर नेपालमाथि भइरहेको थिचोमिचो चलचित्रमा हेर्दा मन अझ रोएको अनि अन्यायप्रति आक्रोस जागेको प्रतिक्रिया दिएका छन् ।
कार्यक्रममा आयोजक डी. बोइज ईन्टरटेनमेन्टका सञ्चालक जीएम ठकुरी, पूर्व महावाणिज्य दूत तथा समाजसेवी दीपक खड्का, एनआरएन अस्ट्रेलियाका पूर्व अध्यक्ष मन केसीका साथै मनोज अधिकारी र सिड्नी निवासी नेपालीहरूको तर्फबाट सो चलचित्रका निर्माता, निर्देशक एवम् अभिनेता नवल खड्कालाई सम्मानित गरिएको थियो ।
निर्देशक खड्काले उज्यालो खबरसँगको कुराकानीमा चलचित्र अस्ट्रेलियाको अन्य स्थानमा थप शोहरू हुने बताउनु भयो । अस्ट्रेलियामा चलचित्रले पाएको मायाप्रति उहाँले आभार व्यक्त गर्नुभएको छ । ‘काँडेतार चलचित्र चलचित्र मात्रै होइन, यो मान्छे र माटो जोगाउने साझा अभियान हो ।’– उहाँले भन्नु भएको छ ।
चलचित्रमा नवलकासाथै सुरविना कार्की, रेविका गुरुङ, गौरव पहाडी, प्रशान्त यादव, मुरलीधर, प्रेम सुब्बालगायतका कलाकारको अभिनय रहेको छ ।
चलचित्र काँडेतारको कार्यकारी निर्मातामा गायिका सत्यकला राई, निर्माता अन्जु केसी, माकिको राई, नादिया खड्का, सनया खड्का रहेका छन् ।
चलचित्र नेपालमा पुनः प्रदर्शनको तयारीमा रहेको निर्देशक खड्काले बताउनु भएको छ ।
