एजेन्सी, फागुन १४
बंगलादेशको ढाकामा रहेको नेपाली दूतावासमा नेपाली सेना दिवस एवं साहित्यिक महोत्सव आयोजना गरिएको छ ।
नेपाली सेनाको २६२औँ स्थापना दिवसको अवसरमा दूतावास परिसरमा आयोजित स्वागत समारोहमा बङ्गलादेशका लागि नेपालका राजदूत घनश्याम भण्डारीले सेना दिवसबाट नेपाल र नेपाली जनताप्रति नेपाली सेनाको अटल समर्पण, वफादार र सेवा झल्कने बताउनु भयो ।
नेपाल र बङ्गलादेशबीचको सैन्य सहयोगलाई उजागर गर्दै त्यसबाट मैत्रीपूर्ण द्विपक्षीय सम्बन्धलाई अझ सुदृढ पार्न योगदान पुग्ने राजदूत भण्डारीले विश्वास व्यक्त गरेको दूतावासले जारी गरेको विज्ञप्तिमा जनाइएको छ ।
कार्यक्रमका प्रमुख अतिथि बङ्गलादेशका प्रधानसेनापति जनरल वाकर–उज–जमानले नेपाल र बङ्गलादेशका सशस्त्र बलबीचको मैत्रीपूर्ण सम्बन्धबारे चर्चा गर्नुभएको थियो ।
संयुक्त राष्ट्रसङ्घको आह्वानमा अन्तर्राष्ट्रिय शान्ति स्थापनामा नेपाली सेनाले निर्वाह गरेको योगदान महत्वपूर्ण रहेको कार्यक्रममा जानकारी गराइएको छ ।
यसैबीच, दूतावासले बङ्गलादेश–नेपालमैत्री समाजसँगको सहकार्यमा साहित्यिक कार्यक्रम पनि आयोजना गरेको थियो । त्यस अवसरमा नेपाल र बङ्गलादेशबीचको सांस्कृतिक तथा भाषिक समानताका विविध पक्षलाई उजागर गर्दै स्रष्टाले आफ्ना रचना वाचन गरेका थिए ।
