एजेन्सी, फागुन २८
पाकिस्तानको बलुचिस्तान क्षेत्रमा सशस्त्र लडाकु समूहले एउटा रेल अपहरण गरी कम्तीमा १० जनाको हत्या गरेको छ ।
पाकिस्तानको पश्चिमी प्रान्त बलुचिस्तानको क्वेट्टाबाट पेशावर शहर जाँदै गरेको जाफर एक्सप्रेसका रूपमा चिनिने नौ डिब्बा रहेको ४ सय ५० यात्रु बोकेको रेललाई लडाकुहरूले मंगलबार दिउँसो एउटा सुरुङमा पुगेपछि नियन्त्रणमा लिएका थिए ।
गोलाबारी गरी मारिएका दशमध्ये नौ जना सुरक्षाकर्मी र एकजना रेल्वे चालक रहेको वरिष्ठ रेल्वे अधिकारी इमरान हयातले जानकारी दिनु भएको सञ्चारमाध्यम सीएनएनले जनाएको छ । बन्दुकधारीहरूले रेलमा आक्रमण गर्नुअघि रेलवे ट्र्याकमा बम विस्फोट गराएको बताइएको छ । लडाकुहरूले महिला र बच्चाहरूलाई ढालको रूपमा प्रयोग गरिरहेका छन् । दक्षिण–पश्चिम पाकिस्तानमा बढ्दो हिंसाको कारकका रुपमा बीएलए पृथकतावादी समूह रहेको उल्लेख छ ।
यसैबीच रेलमा रहेका यात्रुलाई विद्रोही समूहको नियन्त्रणमा लिएको समाचारमा जनाइएको छ ।
