पथरी, चैत ६
मोरङको पथरी शनिश्चरे ९ रिंगुवामा अवस्थित सिंहबाहिनी माद्यमिक विद्यालयलाई हरहिसाबले व्यवस्थित गर्दै गुणस्तरीय शिक्षामा जोड दिन त्यहाँका पूर्व विद्यार्थीहरुले सक्रियता देखाएका छन् ।
यस क्रममा विद्यालय भवनको साजसज्जाका लागि रङ उपलब्ध गराउने अभियान अघि बढेको छ । यस क्रममा पछिल्लो पटक पथरी शनिश्चरे ९ रिंगुवा घर भई हाल विदेशमा रहनु भएका पूर्व विद्यार्थी योगेन्द्र खत्रीले ७ हजार ५ सय रुपैयाँ बराबरको ६० लिटर रङ निःशुल्क उपलब्ध गराउनु भएको भूतपूर्व विद्यार्थी सञ्जालका सदस्य ऋषि चम्लागाईंले जनाउनु भयो । विद्यालयको रंगरोगनको व्यवस्थापनमा सञ्जालकोतर्फबाट चम्लागाईंले संयोजन गरिरहनु भएको छ ।
यसअघि पथरी शनिश्चरे १० रिंगुवाका पूर्व विद्यार्थी युरो पेन्ट्समा कार्यरत चन्द्र कटुवालले १५ हजार रुपैयाँ बराबरको १ सय लिटर रङ निःशुल्क उपलब्ध गराउनु भएको थियो । यस्तै, हाल कोरियामा रहनु भएका पथरी शनिश्चरे ९ रिंगुवाका पूर्व विद्यार्थी डा. देवेन्द्र आचार्यले रङरोगनकैलागि ५ हजार रुपैयाँ उपलब्ध गराउनु भएको पनि चम्लागाईंले बताउनु भयो । सबैतिर रङ लगाउन अझै रङ आवश्यक पर्ने भएकाले यसलाई आपसमा सहयोग जुटाउन लागिपरेको चम्लागाईंले उल्लेख गर्नुभयो ।
स्थापनाकालदेखि नै विद्यालय परिसरमा शुद्ध पिउनेपानीको समस्यालाई भूतपूर्व विद्यार्थीहरुले यस वर्ष समाधान गरेपछि अब विद्यालय भवनको साजसज्जामा ध्यान गएको छ ।
सञ्जालले विशेष गरी विद्यार्थीको पठनपाठनमा सघाउन अक्षयकोष निर्माणको योजना बनाएको सञ्जालका अध्यक्ष राजकुमार नाछिरिङ राईले बताउनु भयो । संस्थालाई नगरपालिका कार्यालयमा विधिवत दर्ता गर्न विधान निर्माणको काम अघि बढाइएको पनि उहाँले जनाउनु भयो ।
