दमक, चैत १४
कोशी प्रदेशमा आवश्यक रहेकोमध्ये २१ प्रतिशत मात्र मल किसानलाई उपलब्ध हुँदै आउँदा उत्पादनमा समस्या भइरहेको छ ।
कोशीमा युरिया १ लाख ३८ हजार ३३५ मेट्रिकटन आवश्यक पर्छ । डीएपी ७७ हजार ३१५ मेट्रिकटन चाहिन्छ भने पोटास ४८ हजार ८०० टनको आवश्यकता पर्दछ ।
समग्रमा प्रदेशमा २१.५ प्रतिशत मल आउँछ । चालु आवमा सबै मिलाएर ६५ हजार टन वितरण भएको कोशी र्प्रदेशको उद्योग कृषि तथा सहकारी मन्त्रालयका सूचना अधिकारी अभिमन्यु अधिकारीले जानकारी दिनुभयो । हालसम्म ३७ हजार ४६७ मेट्रिक टन युरिया, डीएपी २५ हजार १७.७ मेट्रिक टन र पोटास २८ सय २० मेट्रिक टन आएको छ । यति बेला भने चैते धान र मकैका लागि युरिया मल आवश्यक छ ।
आर्थिक वर्ष २०८०/२०८१ मा ५८ हजार ७३.१५ मेट्रिक टन युरिया मल आएको थियो । आर्थिक वर्ष ०७९ /०८० मा ५० हजार ५४३ सय मेट्रिक टन मल आएको थियो । आर्थिक वर्ष ०७८ /७९ मा २६ हजार ९५१ टन मल आएको थियो । आर्थिक वर्ष ०७७ /७८ मा ४० हजार ४१२ टन मल आएको तथ्यांक सूचना अधिकारी यादवले जानकारी गराउनु भयो ।
