काठमाडौं, १८ चैत— प्रधानमन्त्री केपी शर्मा ओलीले चैत १५ गते काठमाडौंको तीनकुने लगायत क्षेत्रमा भएको हिंसात्मक वारदातमा तत्कालीन राजा ज्ञानेन्द्र शाह प्रत्यक्ष संलग्न देखिएको वताउनुभएको छ ।
संघीय संसदमा आज विशेष सम्बोधन गर्दै प्रधानमन्त्री ओलीले तत्कालीन राजा शाहकै निर्देशनमा चैत १५ गते काठामाडौंमा हिंसात्मक घटनाहरु भएको बताउनुभयो । चैत १५ को आन्दोलनपछि उत्पन्न परिस्थितिबारे सदनलाई जानकारी गराउँदै प्रधानमन्त्री ओलीले तत्कालीन राजा ज्ञानेन्द्र शाहले कमान्डर मनोनीत गरेका व्यक्तिले नेपालमा हिंसा मच्चाएकाले कारबाहीको दायरामा ल्याउने स्पष्ट पार्नुभयो ।
‘फागुन २५ गते कथित ‘स्वागत–सवारी’ आयोजना गरियो । चैत १४ गते समाज विथोल्न लागिपरेका एकजना अवाञ्छित व्यक्तिलाई आफ्नै निवासमा डाकेर कथित ‘जनकमाण्डर’ तोक्नु भयो र हिंसात्मक वारदातका लागि खटाउनुभयो’, सदनमा ओली भन्दै हुनुहुन्थ्यो ।
भीड नियन्त्रण गर्न प्रशासनले गरेको प्रयासका विरुद्ध, प्रहरीको बन्दुक खोस्ने, गुण्डागर्दी र कुटपिट गर्ने, लुटपाट गर्नेजस्ता बारदात गरिएको प्रधानमन्त्रीले सदनमा स्पष्ट पार्नुभयो ।
ओलीले भन्नुभयो—‘यस्ता घटनामा संलग्नहरुमाथि जोसुकै होउन्, जुनसुकै कभरमा किन नहोउन्, कडा प्रशासनिक कार्वाही हुन्छ ।’
सोही दिन समाजवादी मोर्चाले गरेको सभा र जुलुस भने शान्तिपूर्ण रहेको भन्दै प्रधानमन्त्री ओलीले आयोजकलाई धन्यवाद दिनुभयो ।
सदनमा प्नधानमन्त्रीकाे सम्बाेधन ( भिडियाे )
