बैङ्कक, चैत २० / थाइल्याण्डको औपचारिक भ्रमण गर्नुभएका प्रधानमन्त्री केपी शर्मा ओली र उहाँका समकक्षीबीच आज संस्कृति र पर्यटनका क्षेत्रमा गरिने सहकार्यसम्बन्धी सम्झौता हुने भएको छ ।
औपचारिक र बहुपक्षीय प्राविधि तथा आर्थिक सहयोगका लागि बंगालको खाडी प्रयास (बिमस्टेक) को छैटौं शिखर सम्मेलनमा सहभागी हुन बैंकक पुग्नु भएका प्रधानमन्त्री ओली र थाइल्याण्डका समकक्षी पे थोङ् थान् सिनावात्राबीच आज भेटवार्ता हुँदैछ । भेटवार्तापछि संस्कृति र पर्यटनका क्षेत्रमा गरिने सहकार्यसम्बन्धी सम्झौतापत्रमा हस्ताक्षर हुने परराष्ट्र मन्त्रालयले जनाएको छ । यसैगरी दुई देशबीचका गैरसरकारी र व्यावसायिक संस्थाबीच विभिन्न ६ सहमतिपत्र आदानप्रदान हुनेछन् ।
सम्झौतापछि दुवै प्रधानमन्त्रीले संयुक्त पत्रकार सम्मेलन गर्ने कार्यतालिका छ । प्रधानमन्त्री ओलीले आजै थाइल्याण्डका राजा महा बजिरालोङकर्नसँग शिष्टाचार भेट गर्ने समेत कार्यक्रम छ ।
थाइल्याण्डका प्रधानमन्त्री सिनावात्राको मैत्रीपूर्ण निमन्त्रणामा नेपालका प्रधानमन्त्रीबाट पहिलोपटक थाइल्याण्डको औपचारिक भ्रमण भएको हो । उहाँ मंगलबार अपरान्ह थाइल्याण्ड पुग्नु भएको थियो ।
