इलाम १, बैशाख । नयाँ वर्ष २०८२ लाई स्वागत गर्न १५ देशका राजदूत एकैसाथ इलाम पुगेका छन् ।
परराष्ट्र मन्त्रालय र पर्यटन बोर्डको आयोजनामा आयोजित कार्यक्रममा सरिक हुन यी राजदूत इलामको सुर्योदय नगरपालिका पुगेका हुन् ।
परराष्ट्र मन्त्री डा. आरजु राणा देउवाको नेतृत्वमा मन्त्रालयका सचिव सहितका कर्मचारी, टुरिजम बोर्डका कर्मचारी, राजदुत सहित ४५ जना भन्दा बढी उच्च तहका पदाधिकारी आइतवार साँझ नै इलाम पुगेका थिए । उनीहरुलाई कन्याममा पंञ्चेबाजासहित स्वागत गरियो । विभिन्न जातजातिको भेषभूषामा सजाएर कन्यामको लभडाँडासम्म घोडसवार पनि गराइएको थियो । जातीय पोशाषकमा सजिएर राजदुतले कन्यामको परिक्रमा गरे ।
नेपालस्थित विभिन्न देशका राजदूतलाई नयाँ वर्षको अवसरमा नयाँ पर्यटकीय गन्तव्यमा भ्रमण गराउने कार्यक्रम अनुसार यसपटक सूर्योदय नगरपालिकाको अन्तु र कन्याममा कार्यक्रम तय भएको सूर्योदय नगरपालिकाका नगर प्रमुख रणबहादुर राईले जानकारी दिनुभयो ।
उहाँहरुलाई श्री अन्तुमा सूर्योदयको दृश्यावलोकन गराएको छ । यो पटक इजिप्ट, दक्षिण कोरिया, संयुक्त अधिराज्य, स्वीटजल्याण्ड, थाइल्याण्ड, अस्ट्रेलिया, फ्रान्स रिपब्लिक, इजरायल, जापान, मलेसिया, श्रीलंका, बंगलादेश लगायत देशका राजदुत आएको नगरपालिकाले जनाएको छ ।
अन्तुमा चिया टिप्दै राजदूत
सूर्योदय नगरपालिकाको अन्तुमा आएका राजदूतले त्यहाँको चिया बगानमा चिया टिपेर अनुभव लिएका छन् । राजदूतहरुले चिया बोक्ने डालो भिरेरै चिया टिपेका थिए् ।
परराष्ट्र मन्त्रालयका सचिव अमृतबहादुर राईले सबै राजदूतका लागि यो फरक अनुभव भएको बताउनुभयो । राजदूतहरुले टिपेको चिया जोखेर नामसहित राखिएको छ र उनीहरुले टिपेको चिया प्रशोधन गरी तयार पारेर उहाँहरुलाई पठाइने नगर प्रमुख रणबहादुर राईले बताउनुभयो । ‘इलामको चिया चिनाउनका लागि हामीले यो प्रयास गरेका हौं ।’
सो क्रममा अस्ट्रेलियाका राजदूत लेनान जोनस्टनले त नेपाली चिया पिउन पाए पनि बोटमै आएर चिया टिप्ने अनुभव लिन पाएकोमा खुसी हुँदै इलामको चियालाई विश्व बजारसम्म पु¥याउनका लागि पहल गर्नै प्रतिवद्धता समेत जनाएको भ्रमण टोलीका सदस्यहरु बताउँछन् ।
अन्तुमा फिसिङ र डुङ्गा सयर
भ्रमण अन्तर्गत सोमबार अन्तु पोखरीमा राजदूतलाई डुङ्गा सयर गाउनका साथै माछा झिक्ने (फिसिङ) गराइएको छ । परराष्ट्र मन्त्रालयको वार्षिक कार्यक्रम अनुसार अनौपचारिक भ्रमण अन्र्तगत इलामको अन्तु पुगेका राजदुतहरुले अन्तुमा डुङ्गा शयर र माछा मारेर मनोरञ्जन लिएका हुन् ।
नेपालको विकास र समृद्धिको आधार पर्यटनः परराष्ट्रमन्त्री
यसैबीच परराष्ट्र मन्त्री डा आरजु राणा देउवाले नेपालको विकास र समृद्धको आधार पर्यटन रहेको बताउनुभएको छ ।
परराष्ट्र मन्त्रालयद्वारा नेपालमा रहेका विदेशी नियोग तथा विभिन्न अन्तर्राष्ट्रिय संघ संगठनका प्रमुख तथा प्रतिनिधिका लागि इलामको श्रीअन्तु र कन्याममा आयोजना गरिएको रिट्रिट कार्यक्रममा उहाँले यस्तो बताउनुभएको हो ।
‘नेपालका अद्वितीय संस्कृति र सम्पदा एवं प्राकृतिक सौन्दर्य विश्वका प्रमुख आकर्षण हुन् र हाम्रा यी अमूल्य सम्पत्ति नै मुलुकको विकास र समृद्धिका आधार हुन् । ’ नयाँ वर्षले नेपालको विविधता, समृद्ध संस्कृति र प्राकृतिक सौन्दर्यको आत्मीय आतिथ्यलाई विश्व समुदायसँग साझा गर्ने पनि मन्त्री राणाले बताउनुभयो ।
