दमक, ३ बैशाख / दमक ९ स्थित सरस्वती माविले आफ्नो जमिनमा केही समयका लागि मात्र सञ्चालन गर्न दिएको दमक ८ स्थित गड मदर एकेडेमी एण्ड टेक्नोलोजी सञ्चालन भएको जमिन खाली गराउन दिएको ज्ञापनपत्रपछि नगरपालिका कार्यालयले सार्वजनिक सूचना जारी गरेको छ ।
बुधबार विद्यालयले दिएको ज्ञापनपत्रपछि नगरपालिकाको तर्फबाट नगर प्रमुख रामकुमार थापाले एक प्रेस विज्ञप्ति जारी गरी अवको शैक्षिक शत्रमा नयाँ भर्ना नलिइ जग्गा खाली गर्न निर्देशनात्मक जानकारी गराउनु भएको छ । सो सम्बन्धमा दमक नगर कार्यपालिकाको ०८१ भदौ ७ गतेको निर्णय भएको र अटेर गरिरहेको अवस्थामा गत चैत २६ गते गडमदरलाई विद्यालय खाली गर्न पत्राचार गरिएको विज्ञप्तिमा जनाइएको छ ।
सरस्वती माविकातर्फबाट बुधबार प्रधानाध्यापक सीताराम ढकाल र विद्यालय व्यवस्थापन समितिका अध्यक्ष रेवतराज पुरी गगनसहितको विद्यालयको टोलीले जमिन तत्काल खाली गराउन माग गर्दै नगरपालिकामा ज्ञापनपत्र बुझाएको थियो । जमिन खाली नगरेको भन्दै दमक नगरपालिकाको ध्यानाकषर्ण गराइएको ज्ञापनपत्रमा सात दिन भित्रमा सो गडमदर एकेडेमीले ठाउँ खाली नगरे दमक नगरपालिकाको मुल गेटमै ताला लगाएर आन्दोलन गर्ने चेतावनी दिइएको थियो ।
ज्ञापनपत्र दमक नगरपालिकाका प्रमुख राम कुमार थापा र उप प्रमुख रेगिना भट्टराई प्रसाईंलाई बुझाइएको हो । सरस्वती मावि विद्यालय व्यवस्थापन समितिका अध्यक्ष रेवतराज पुरी गगनले विद्यालयको सम्पूर्ण जमिन नगरपालिका मातहत रहेकोले नगरपालिकामा आएर ज्ञापन पत्र बुझाउनु परेको स्पष्ट पार्नु भयो ।
ज्ञापनपत्र बुझेपछि नगरका प्रमुख रामकुमार थापाले सो विद्यालयलाई त्यहाँबाट हट्न भनेर लिखित पत्र पठाइसकेको बताउनु भएको थियो । उहाँले सातदिनभित्रै हटाइसक्ने पहलमा लाग्ने जनाउनु भयो । त्यस क्षेत्रका अभिावकहरुलाई समेत सचेत बनाउने र सकेसम्म सात दिनभित्रैमा ठाउँ खाली गराउने कुरामा लागिपर्ने थापाले प्रतिवद्धता जनाउनु भयो ।
यस अघि पनि विद्यालयले नगरपालिकालाई यसखाले दवाब दिएको थियो । सो दवाव पछि नगरपालिकाले वडा नम्बर ८ का वडाध्यक्ष धर्मप्रसाद दाहाल दिपेशको संयोजकत्वमा अध्ययन समिति बनाएको थियो । सो समितिले पनि सो विद्यालयले अहिलेको शैक्षिक सत्र सुरु हुनु अघिनै जमिन खाली गरिसक्नु पर्ने निचोडको प्रतिवेदन नगर प्रमुख समक्ष बुझाएको थियो ।
