दमक, २३ बैशाख / दमक नगरपालिका कार्यालयले नगरवासीको स्वास्थ्य प्रवद्र्धन र स्वास्थ्य सचेतनाका क्षेत्रमा सक्रियता देखाइरहेको छ । जस अन्तर्गत नसर्ने रोगका रुपमा समस्या बढ्दै गएको पुरुषको प्रोष्टेट क्यान्सर हुनबाट रोक्न खोजपड्ताल कार्य अघि बढाएको छ ।
यस क्रममा मंगलबार दमक ५ मा वडाका ५५ वर्ष माथिका पुरुषका लागि त्यहाँको आधारभूत स्वास्थ्य केन्द्रमा ‘प्रोष्टेट क्यान्सर स्क्रिनिङ शिविर’ सञ्चालन भएको छ ।
कार्यक्रममा बोल्दै दमक नगर प्रमुख रामकुमार थापाले हालसम्म ३० जना विशेषज्ञ डाक्टरसहित ८७ वटा बेडको नगर अस्पताललाई १ सय बेडको पुर्याउनै लागेको जनाउनु भयो । योसँगै अब ३ सय बेडको अस्पतालको प्रक्रियामा सरकारको माथिल्यो निकायसँग पहल गरिरहेको उल्लेख गर्नुभयो । वडा वडामा ल्याब सेवा समेत विस्तार गर्दै लगेको समेत जनाउँदै स्वास्थ्य क्षेत्रमा प्रगति गर्न सकेको उहाँको भनाई छ ।
नगर उपप्रमुख रेगिना भट्टराई प्रसाईंले भौतिक निर्माणको प्रक्रियालाई मात्र विकास नभनी स्थानीयको स्वास्थ्यलाई ध्यानमा राखेर रोग लाग्न नदिने काम अझ महत्वपूर्ण विकास भएको धारणा राख्नु भयो ।
कार्यक्रममा बोल्दै दमक नगर स्वास्थ्य शाखा प्रमुख ब्रजेश मेहताले दिनदिनै सहरी क्षेत्रमा प्रोष्टेट क्यान्सर बढ्दो अवस्थामा रहेकाले त्यसको सचेतना अपनाउने सन्देशका लागि यसखाले कार्यक्रम राखिएको बताउनु भयो ।
५ नम्बर वडाका कार्यवाहक अध्यक्ष खड्गबहादुर राईको अध्यक्षतामा वडा सदस्य शोभा खतिवडा बेल्बासेले कार्यक्रमको औचित्यसहित स्वागत गर्दै वडाको स्वास्थ्य प्रयासको सन्दर्भ जोड्नु भयो ।
