दमक, २५ बैशाख / दमकमा गत चैत २१ गतेबाट बैशाख ५ गतेसम्म आयोजित आदिवासी जनजाति सांस्कृतिक महोत्सव २०८१/८२ को प्रगति प्रतिवेदन सार्वजनिक गरिएको छ ।
आयोजक नेपाल आदिवासी जनजाति महासंघ नगर समन्वय परिषद् दमकले आज पत्रकार सम्मेलन गर्दै प्रतिवेदन सार्वजनिक गरेको हो ।
सार्वजनिक प्रतिवेदन अनुसार महोत्सवमा बिभिन्न शिर्षकबाट २७ लाख रुपैयाँ आम्दानी भएको देखाइएको छ भने बिभिन्न शिर्षक अन्तर्गत २४ लाख रुपैयाँ खर्च भएको देखाइएको छ ।
महोत्सवबाट ३ लाख रुपैयाँ बचत गर्न सफल भएको नेपाल आदिवासी जनजाति महासंघ नगर समन्वय परिषद् दमकका अध्यक्ष अम्बर बहादुर कुमालले जानकारी दिनुभयो ।
यस्तै, महोत्सबमा राखिएका जातीय घरहरु मध्येका ४ वटा उत्कृष्ठ घरलाई सम्मान तथा पुरस्कृत समेत गरिएको थियो । महोत्सबमा नेवा देय दबु दमकले सान्त्वना पुरस्कार प्राप्त गरेको थियो भने नेपाल कुमाल समाजले तेश्रो तथा नेपाल माझी उत्थान संघ दमकले दोश्रो पुरस्कार प्राप्त गरेको थियो ।
यस्तै, नेपाल राजबंशी सेवा समाजले महोत्सवमा निर्माण गरेको जातीय घरले पहिलो पुरस्कार जितेको छ । पहिलो, दोश्रो तेश्रो र सान्त्वना पुरस्कारको राशि क्रमश १० हजार, ८ हजार, ६ हजार र ४ हजार रहेको महासंघ नगर समन्वय परिषद् दमकका सचिव समुन्द्रा लामाले जानकारी दिनुभयो ।
यस्तै, महोत्सबको आयोजकले स्थानीय तिनवटा टोल विकास संस्थालाई ३० वटा कुर्सी समेत हस्तान्तरण गरेको थियो ।
पत्रकार सम्मलेनमा प्रमुख आतिथिका रुपमा रहनुभएका दमक नगरपालिका वडा नम्बर ७ का वडाध्यक्ष भिमप्रसाद पौडेलले यस पटकको महोत्सवले जे जति सफलता हासिल गरेको भएपनि यसबाट सिकेका पाठले आगामी महोत्सव गर्न थप प्रेरित गरोस् भन्ने शुभकामना ब्यक्त गर्नुभएको थियो । उहाँले स्थानीय जनप्रतिनिधि सदैब सबैका साथ र सहयोगका निम्ति तयार रहेको पनि धारणा राख्नुभएको थियो ।
महोत्सबमा जातीय घरहरु साथै बिभिन्न कला, संस्कृति र साँझ ख्यातिप्राप्त कलाकारहरुको सांगीतिक प्रस्तुती रहेको थियो ।
