दमक , २८ बैशाख । आइतबार साँझ झापामा एकाएक हावाहुरी सहित भारी बर्षा भएकाे छ ।
आँधिहुरीका कारण जिल्लाका विभिन्न स्थानमा क्षति पुर्याएको जिल्ला प्रहरी कार्यालय झापाले जनाएको छ ।
मेचीनगर नगरपालिका वडा नं.१५ गाईनाबारी स्थित धुलाबारी बस्ने कपिल क्षेत्री लगायतले सामुहिक रुपमा संचालन गरेको कामक्ष इण्डष्ट्रिज प्राईभेट लिमिटेड (प्लाई उद्योग) मा पानी संगै आएको हावा हुरीले पिलिङ भवनको पश्चिम साईडको ट्रस,जस्ताले बनेको छाना उडाएको छ भने सोहि ठाँउमा जडान गरेको १ वटा CCTV क्यामेरा समेतमा फुटाएको छ । जसको मुचुल्का बनाउदा प्रहरीले २ लाख २० हजार बराबरको क्षति भएको प्रहरीले जनाएको छ ।
यस्तै दमक नगरपालिका वडा न. ८ बस्ने बर्ष ५५ को दुर्गा प्रसाईले संचालन गरेको दुर्गा काटा गल्ला भण्डारमा ( फापर, धान, मकै) स्टोर गरेको हलको ३५ वटा जस्ता पाता पुर्ण रुपमा उडाएको र छानाको भागमा रहेको फलामको पाईपहरु समेत बाङ्गिई क्षती भएको र उक्त स्टोर हलको भित्र रहेको ५५/६० बोरा फापर समेत पानीले असर गरेको प्रहरीको रिपोर्टमा उल्लेख गरिएको छ । यो घटनाबाट प्रसाईको एक लाख पँचास हजार बराबरको क्षति भएको प्रहरीले जनाएको छ ।
यसैगरी हल्दिबारी गाउपालिका वडा न. ४ बलटोल बस्ने वर्ष ६९ को सकलदिप साहको टिनको छाना बाँसको टाटीबेराले बनेको तीन कोठे कच्चि घर पानी संगै आएको हावा हुरीले उडाई पुर्ण रुपमा क्षति हुदा एक लाख पचास हजार बराबरको क्षति भएको छ ।
हावाहुरिकै कारण दमक नगरपालिका वडा न. ४ संगम चोक बस्ने बर्ष ३८ की कमला अधिकारीको डेढ तले पक्की घरको माथीको तलाको सिडी छोप्ने जस्ता उडाएको र जसबाट अधिकारीलाई तिस हजार बराबरको क्षती भएको प्रहरीले सार्बजनिक गरेको रिपोर्टमा उल्लेख छ ।
यस्तै यहि ठाउमा बस्ने वर्ष ५२ को भिम प्रसाद सिक्देलको पक्की घरको माथिलो तलाको दुई वटा कोठाको जस्ता उडादा साठ्ठी हजार बराबरको क्षति भएको जनाइएको छ ।
