पथरी, ३१ बैशाख / उत्तरपूर्वी मोरङको लेटाङमा रहेको मार्केटमा आज बिहान आगलागी हुँदा २५ लाख बढी रुपैयाँ बराबरको क्षति भएको छ ।
लेटाङ नगरपालिका ३ वीपी चौकस्थित डिल्ली पोखरेलको पक्की घरको पहिलो तलामा सुरजकुमार साहले खोलेको ताज सिम्पल मार्केटमा बिजुलीको लाइन सर्ट भई आगलागी भएको प्रहरीले जनाएको छ । आगलागीबाट ५ थान फ्रिज, खाद्यान्न सामग्री, बेकरी सामग्री र अन्य विभिन्न पेय पदार्थ समेत गरी करिब २५ लाख बराबरको क्षति भएको इलाका प्रहरी कार्यालय लेटाङले जनाएको छ ।
बिहान ३ बजे लागेको आगो दमकल, इप्रका लेटाङबाट खटिएका प्रहरी, नगर प्रहरी र स्थानीय बासिन्दाको सहयोगमा ३.३० बजे पूर्णरुपमा नियन्त्रणमा आएको थियो ।
