दमक, १ जेठ / तत्कालीन राजा वीरेन्द्र शाह र उहाँको परिवारको सम्पत्तिबाट सरकारलाई झण्डै २९ करोड रुपैयाँको आम्दानी भएको छ ।
पूर्व राजपरिवारको नाममा रहेको नेपाल ट्रष्टको कार्यालयबाट यसवर्ष सरकारलाई २८ करोड ८० लाख ५५ हजार रुपैयाँ आम्दानी भएको देखिएको महालेखा परीक्षकको कार्यालयले उल्लेख गरेको छ ।
महालेखापरीक्षकको ६२ औँ वार्षिक प्रतिवेदन २०८२ मा ट्रष्टले व्याज र लिज भाडाबापत सो रकम आम्दानी गरेको उल्लेख छ । प्रतिवेदनमा ट्रष्टले यो वर्ष ब्याजबापत १४ करोड ८० लाख आम्दानी र लिज भाडाबापत १० संस्थाबाट १४ करोड १ लाख ५५ हजार आयआर्जन गरेको लेखिएको छ । जसमध्ये ६ करोड ९५ लाख १९ हजार खर्च भएको प्रतिवेदन छ ।
तत्कालीन राजा वीरेन्द्र, रानी ऐश्वर्यको निधन भएपछि सो परिवारको नाममा रहेको र हक पुग्ने सम्पत्तिको व्यवस्थापन गरी राष्ट्रहितमा प्रयोग गर्न नेपाल ट्रष्टको कार्यालय स्थापना भएको थियो । ट्रष्टको स्थापनाकालदेखि हालसम्म विभिन्न १२ जिल्लामा २१ हजार ६३३ रोपनी १५ आना जग्गा ट्रष्टको स्वामित्वमा छ । यस्तै विभिन्न वाणिज्य बैंकमा ब्रिटिस पाउण्ड ५४ हजार २८९, अमेरिकी डलर १ लाख ७३ हजार ६२६ र १ अर्ब ६८ करोड ३ लाख ५० हजार मौज्दात रहेको जनाइएको छ ।
ट्रष्टको नाममा नबिल बैंक, होटल डेला अन्नपूर्ण र राष्ट्रिय वाणिज्य बैंकको समेत १२ लाख ९९ हजार ७३५ कित्ता सेयर रहेको महालेखापरीक्षकको ६२ औँ वार्षिक प्रतिवेदन २०८२ मा उल्लेख छ । महालेखाले ट्रष्टको नाममा रहेको जग्गा जमिन तथा भवनहरू नेपाल ट्रस्ट ऐनमा गरिएको व्यवस्थाअनुरूप उपयोग गर्न सुझाव दिएको छ ।
