अर्जुनधारा, ३१ जेठ । झापाको अर्जुनधारा नगरपालिका–११ स्थित सीएम स्वीमिङ पुलमा पौडी खेल्ने क्रममा डुबेर एक जनाको ज्यान गएको छ।
जिल्ला प्रहरी कार्यालय झापाका अनुसार काठमाडौँ महानगरपालिका–१४ बाफल घर भई हाल झापाको बिर्तामोड नगरपालिका–११ बसपार्कमा बस्दै आएका ४० वर्षीय केशव पाठकको पौडी खेल्ने क्रममा डुबेर मृत्यु भएको हो।
घटनास्थलमा उपस्थित प्रहरीका अनुसार घटनाका बेला साँझ अन्दाजी शनिबार ८:३० बजे पाठक स्वीमिङ पुलमा पौडी खेल्ने क्रममा डुबेर घाइते भएका थिए। तत्कालै उनका साथीसँगै रहेका व्यक्तिहरूले उद्धार गरी बिर्तामोडस्थित बि एण्ड सी अस्पताल पुर्याए पनि चिकित्सकले उनलाई मृत घोषणा गरेका हुन्।
उक्त घटनाको थप अनुसन्धानका लागि इलाका प्रहरी कार्यालय अनारमनीबाट प्रहरी अधिकृतको टोली खटिएको जिल्ला प्रहरी कार्यालय झापाले जनाएको छ।
पुलिसले यस घटनासम्बन्धी सबै तथ्य संकलन गर्ने कार्य अगाडि बढाएको छ भने स्वीमिङ पुलको सुरक्षा व्यवस्थाबारे पनि अनुसन्धान हुने जनाइएको छ।
