दमक ,२४ असार । कोरोना भाइरसको संक्रमण फेरि देखा पर्न थालेपछि विराटनगर महानगरपालिकामा सतर्कता अपनाउन थालिएको छ । केही समय शान्त रहेको कोरोना अब पुनः सक्रिय बन्दै जाँदा सर्वसाधारणमा चिन्ता बढेको छ ।
महानगरको स्वास्थ्य महाशाखाबाट प्राप्त पछिल्लो विवरण अनुसार हालसम्म महानगरभित्र ४ जनामा कोरोना पोजेटिभ देखिएको पुष्टि गरिएको छ । स्वास्थ्य महाशाखा प्रमुख डा. दिलीप यादवका अनुसार संक्रमितमध्ये विराटनगर–१६ नम्बर वडामा एक जना, वडा नम्बर २ मा दुई जना र वडा नम्बर ९ मा एक जना रहेका छन । कोरोनाको फैलावट रोक्न महानगरले असार २५ र २६ गते खोप अभियान सञ्चालन गर्ने भएको छ ।
यो अभियान विशेषत दीर्घरोगी र ५५ वर्षभन्दा माथिका नागरिकलाई लक्षित गरि सञ्चालन गरिने बताँउनु भयो । डा. यादवका अनुसार यी समुहका व्यक्तिहरूको रोग प्रतिरोधात्मक क्षमता कम हुने भएकाले पहिलो प्राथमिकतामा राखिएको हो । खोप विराटनगरको १९ वटै वडाका स्वास्थ्य चौकीहरूमा सहज रूपमा उपलब्ध गराइने महानगरले जनाएको छ ।
यदि कसैमा कोरोनाको लक्षण देखा परेमा पनि परीक्षण गरी खोप लिन सकिने व्यवस्था गरिएको बताँउनु भयो । साथै, ज्वरो, खोकी, नाकबाट पानी आउने, श्वास फेर्न गाह्रो हुनेजस्ता लक्षण देखिएमा ढिला नगरी नजिकको स्वास्थ्य चौकीमा जान डाक्टर यादवले आग्रह गर्नु भयो।
