दमक,३० असार । झापाको दमकमा स्कुटरको ठक्करबाट एक पैदलयात्री वृद्ध सख्त घाइते भएका छन् । गएराति दमक –१० जहदा टोलस्थित भित्री सडकखण्डमा मे.७ प.३७८९ नम्बरको स्कुटरले पैदलयात्री सोही ठाउँ बस्ने ७७ वर्षीय देवबहादुर श्रेष्ठलाई ठक्कर दिएको हो ।
दुर्घटनामा श्रेष्ठको दाहिने हात भाँच्चिएको छ भने टाउको, दुबै खुट्टा र अनुहारमा चोट लागेको छ । बोल्न नसक्ने गम्भीर घाइते श्रेष्ठलाई निम्स अस्पताल दमकमा सामान्य उपचारपश्चात थप उपचारको लागि विराट टिचिङ अस्पताल बिराटनगर रेफर गरिएको प्रहरीले जनाएको छ ।
स्कुटर चालक तेह्रथुम म्याङलुङ घर भई हाल दमक –१० बस्ने थुमनारायण खापुङका छोरा १६ वर्षीय अर्चन खापुङलाई नियन्त्रणमा लिई इलाका प्रहरी कार्यालय दमकमा राखिएको प्रहरीले बताएको छ ।
