दमक,३ साउन । एक समय चिया पसलमै सीमित हुन्थ्यो युवाहरुको भेटघाट र गफगाफ । तर अहिले, दमकका गल्ली र बजारमा फैलिएको छ एक नयाँ स्वाद — कफी । चाहे कामको थकान मेट्ने बहाना होस् वा साथीहरुसँग समय बिताउँने स्थान, कफी सपहरू युवादेखि वृद्धसम्मको रोजाइ बन्दै गएका छन् ।
व्यवसायको शिलशिलामा कफीमै आफ्नो भविष्य देखेर झापा बिर्तामोडका राम तिवारीले दमकमा आएर कफि व्यवसाय सुरु गर्नुभयो । थर्ड होम कफि सप नाम दिएर उहाँले कफी व्यवसाय सञ्चालन गरिरहनुभएको छ । आफु आईटि क्षेत्रको बिद्यार्थी भएपनि एक दशक भन्दा बढि समय बैदेशिक रोजगारीमा रहदा कफी व्यवसायको अनुभब बटुलेपछि दमकमा कफ व्यवसाय सुरु गरेको उहाँको भनाइ छ ।
राम तिवारी मात्र होईन, दमककै अर्का कफी व्यवसायी बिमल तामाङ पछिल्लो समयमा कफी संस्कृती एकदमै बढेकोले व्यावसाय पनि राम्रो भईरहेको बताउनुहुन्छ । नेपालमा कफी व्यवसायको राम्रो संभाबना देखेपछि उहाँले पनि दमकमा माई क्याफे नाम दिएर कफि व्यवसाय सञ्चालन गरिरहनुभएको छ ।
कफी सप सञ्चालनले युवाहरूलाई रोजगारी सिर्जना मात्र होइन, उद्यमशीलताको प्रेरणासमेत दिएको छ । कफीमा स्वाद मात्र होइन, त्यसको स्रोतप्रति पनि ग्राहक चासो राख्न थालेका छन । केही कफी सपहरूले अब स्थानीय नेपाली अर्गानिक कफी (जस्तै इलाम वा गुल्मीबाट आएको) प्रयोग गर्न थालेका छन । यसले स्वदेशी उत्पादनको प्रवर्धनसँगै उपभोक्तामा सचेतना पनि ल्याइरहेको बताउनुहुन्छ दमक बहुमुखी क्याम्पसका प्राध्यापक प्रभात शिवाकोटी । अहिलेका पुस्तामा कफि कल्चरको बिकास भएको उहाँको भनाइ छ ।
दमकमा १५ देखि २० वटा सम्मको संख्यामा दर्ता गरेर यस्ता क्याफेहरु सञ्चालनमा रहेको बताँउनु हुन्छ दमक नगरपालिकाको राजश्व शाखाका प्रमुख डम्बर राज बराल । धेरै लगानि गरि सञ्चालन भएको क बर्ग र थोरै लगानीमा सुरु भएकालाई ख बर्ग गरि क्याफेलाइ दुई बर्गमा बर्गिकरण गरिएको छ । आर्थिक ऐन अनुसार बार्षिक रुपमा क वर्गले ७००० र ख बर्गले ५००० औषतमा कर तिर्ने गरेको बरालले जानकारी दिनुभयो ।
कफी संस्कृतिको विस्तारले दमकको शहरी स्वरूपलाई नयाँ आयाम दिएको छ । स्वादको आनन्दसँगै जीवनशैलीमा आएको परिवर्तन, युवा जमातको चेतनास्तरमा भएको बृद्धि र उद्यमशीलतामा देखिएको उछालले यो क्रम भविष्यमा अझ विस्तार हुने देखिन्छ ।
