दमक, २ असोज । भदौ २३ र २४ गते भएको सामाजिक सञ्जाल बन्द र भ्रष्टाचारविरुद्धको जेनजी आन्दोलनले देशभरि गहिरो चोट पु¥याएको छ। आन्दोलन शान्तिपूर्ण हुनुपर्ने बेला राजधानीदेखि गाउँ–गाउँसम्म आगजनी, तोडफोड र हिंसात्मक गतिविधिले देशलाई स्तब्ध बनायो। यी दुई दिनमा मात्र ७३ जनाले ज्यान गुमाए भने सयौं घाइते भए। सरकारी भवनहरूमा आगो लगाइयो, नेताहरूको घर समेत जलाइयो। प्रहरी चौकीहरू जलाइएपछि आन्दोलनकारीले हातहतियार लुटे, कैदीहरू जेलबाट भागे। सुरक्षा दिनुपर्ने प्रहरी नै असहाय भएपछि जनताले अझै ठूलो त्रास अनुभव गरिरहेका छन्।
दमक बजारमा दशैं नजिकिँदै गर्दा पनि सामान्य चहलपहल छैन। जनताले खुलेर किनमेल गर्न वा बाहिर निस्कन सहज महसुस गरिरहेका छैनन्। दमकमा व्यवसाय गर्दै आउनुभएका भोजराज पौडेलले प्रहरी चौकी र राज्यका मूल्यवान संस्थाहरू जलाउनु क्षम्य नहुने बताउनुभयो। उहाँले यस्तो कार्य गर्नेहरूलाई आजीवन सजाय दिनुपर्ने धारणा राख्नुभयो।
दमक–६ निवासीनै अस्मिता गजमेरले कैदी भागेपछि आफूलाई सुरक्षित महसुस गर्न नसकेको अनुभव सुनाउनुभयो। उहाँका अनुसार अहिले बाहिर निस्कन पनि डर लागि रहेको छ। कहाँ कस्ले के गर्ने हो भन्ने मनमा त्रास बोकेर हिड्नु परि रहेको उहाले बताउनुभयो ।
इलाम चुलाचुली–५ का विरमान तामाङले शान्तिपूर्ण आन्दोलन हुनुपर्नेमा नेताहरूको स्वार्थ र भ्रष्टाचारका कारण ठूलो धन जनको क्षति भएको आरोप लगाउनुभयो। घुसपैठ समेत भएको आसंका गरिएपनि त्यसको सत्य तथ्य छनविन गरि दोशीलाई कार्वाही गर्न उहाँले माग गर्नु भएको छ ।
आज पनि जनताले उहीँ आवाज उठाइ रहेका छन । भ्रस्टाचार अन्त्य गर्न सरकारले ठोस कदम चालोस्, दोषीलाई सजाय दिओस्, निर्दोष जनताको रगत र पसिनाबाट बनेका सम्पत्तिहरूको रक्षा गरोस्। केवल आश्वासनले होइन, ठोस कार्यले मात्र जनतामा फेरि विश्वास, आशा र सुरक्षाको अनुभूति गर्न सकुन ।
