काठमाडौं– प्रतिनिधि सभाको कार्य व्यवस्था परामर्श समितिको बैठक सुरु भएको छ। दिउँसो १ बजेका लागि बोलाइएको संसदमा एमसीसीमाथि छलफल हुने भएकाले त्यसअघि केके गर्ने भन्ने विषयमा छलफल गर्न र अजेण्डा तय गर्न सभामुख अग्निप्रसाद सापकोटाले कार्य व्यवस्थाको बैठक बोलाएका हुन्।
करिब ३२ महिनापछि विवादकै बीचमा एमसीसी संसदमा टेवल भएको छ। सत्तारुढ दलहरुभित्रै विवाद भइरहेको अवस्थामा एमसीसीमाथि छलफल सुरु हुँदै छ। सत्ताभित्र रहेका दलहरु यस विषयमा विभाजित रहेका छन्।
प्रधानमन्त्री शेरबहादुर देउवाको पार्टी नेपाली कांग्रेस एमसीसी पारित गर्ने पक्षमा छ भने माओवादी केन्द्र र एकीकृत समाजवादी विपक्षमा रहेको छ। एकीकृत समाजवादीले खुलेर विरोध गरेको छैन भने माओवादीले विपक्षमा भोट हाल्ने भन्दै आएको छ।
सत्तारुढ गठवन्धनकै बीचमा विवाद भएको अवस्थामा प्रतिपक्ष नेकपा एमाले भने मौन रहँदै आएको छ। आफ्नो पार्टीको सरकार भएको संसदमा टेबल गरेको उक्त प्रस्ताव पारित गर्ने भोट दिने वा नदिने कुनै निर्णय एमालेले गरेको छैन। एमालेले निर्णय नगर्दा एमसीसी पारित हुने वा फेल हुने अंकगणित प्रस्ट हुन सकेको छैन।
कार्य व्यवस्थामा सामान्य छलफलमा कुन कुन दलले भाग लिने र कति दिनसम्म छलफल गर्ने तय हुनेछ। संसद् सचिवलायले सम्भावित कार्यसूचीमा एमसीसी राखेका छन् ।
