ताप्लेजुङ, ९ कात्तिक । ताप्लेजुङ स्थित प्रसिद्ध धार्मिकस्थल पाथीभरा मन्दिरमा शनिबार यो यामकै सबैभन्दा धेरै दर्शनार्थी पुगेका छन् । पाथीभरा क्षेत्र विकास समितिका अनुसार शनिबार एकै दिन छ हजार ३९३ जना भक्तजनले पाथीभराको दर्शन गरेका थिए। बिहान ३ः०० देखि दिउँसो ३ः०० बजेसम्म लाइनमा बसेर भक्तजनले पूजाअर्चना गरेका हुन् । पाथीभरामा वर्षभर नै भक्तजनको आगमन हुने गरेको छ । तर विशेषगरी दसैँतिहारका समयमा तुलनात्मक रूपमा धेरै भक्तजनको आगमन हुने गरेको छ । त्यसपछि चैतेदसैँको आसपासमा समेत धेरै भक्तजन आउने गर्द छन्।
समितिका अनुसार यसअघि गत असोजभर २९ हजार १७४ जना भक्तजनले मन्दिरको दर्शन गरेका छन् । यस्तै आइतबार पनि पाथीभरामा बिहानैदेखि भक्तजनको भीड उपस्थिति देखिएको समितिका कार्यकारी निर्देशक प्रजिन हाङबाङले बताँउनु भयो । पाथीभरामा सरसफाई गरिएको छ । पाथीभरा क्षेत्र विकास समिति र फुङ्लिङ नगरपालिकाको संयुक्त आयोजनामा शनिबार सरसफाई गरिएको छ।
समितिका कार्यकारी निर्देशक हाङ्बाङका अनुसार पाथीभरा धामसहितका क्षेत्रमा सरसफाई गरिएको छ । पाथीभरा क्षेत्रअन्तर्गत काफ्लेपाटी, बलुडाँडा, गुराँसे, फेदी हुँदै पाथीभरा धाम पुग्ने पदमार्ग र धाम परिसरमा सरसफाई गरिएको कार्यकारी निर्देशक हाङ्बाङले बताँउनु भयो।
समुन्द्र सतहदेखि तीन हजार ७९४ मिटरको उचाइमा अवस्थित पाथीभरामा गतवर्ष पनि पाथीभरा क्षेत्र विकास समितिको आयोजनामा सरसफाई तथा संयुक्त पूजापाठ गरिएको थियो । प्रसिद्ध तथा पवित्र शक्तिपीठ पाथीभराको महिमालाई कायम राखी पाथीभराको थप प्रवद्र्धन र प्रचारप्रसार गर्ने उद्देश्यसहित सरसफाइसँगै संयुक्त पूजा आयोजना गरिएको समितिका कार्यकारी निर्देशक हाङ्बाङले बताँउनु भयो।
