दमक| कार्तिक १९ | जेन–जी आन्दोलनका क्रममा लुटिएको एउटा इन्सास हतियार झापामा फेला परेको छ।
जिल्ला प्रहरी कार्यालय झापाका अनुसार विर्तामोड नगरपालिका–६, सुगम शान्ति टोलको तोरीवारी नजिक सिमल तरुलको झाडीमा वेवारिसे अवस्थामा ०३११००८७२ नम्बरको इन्सास हतियार एक थान, त्यसको म्याग्जिन एक थान, १९ राउण्ड सावुत र २ राउण्ड वेसावुत गोली फेला परेको हो।
प्रहरीका अनुसार उक्त हतियार कार्तिक २४ गते जेन–जी आन्दोलनको क्रममा इलाका प्रहरी कार्यालय अनारमनीबाटै लुटिएको थियो। फेला परेपछि हतियार इप्रका अनारमनीमा सुरक्षित राखिएको र थप अनुसन्धान भइरहेको प्रहरीले जनाएको छ।
प्रहरी स्रोतका अनुसार हालसम्म इलाका प्रहरी कार्यालय दमक र बिर्तामोडबाट लुटिएका हतियारमध्ये अझै २२ नाल फेला पर्न बाँकी छन्।
प्रहरीले बाँकी हतियारको खोजी तीव्र बनाएको र घटनामा संलग्न व्यक्तिहरूको पहिचानका लागि अनुसन्धान जारी रहेको जनाएको छ।
