काठमाण्डौ,२० कार्तिक। विभिन्न प्रलोभनमा म्यानमार पुगेका १४ जना नेपालीको उद्धार गरिएको छ । उनीहरूलाई म्यानमारमा रहेको नेपाली दूतावासको पहलमा उद्धार गरिएको छ। उनीहरूलाई म्यानमारको म्यावडीबाट उद्धार गरी हिजो नेपाल पठाइएको थाइल्याण्डमा रहेको नेपाली दूतावासले बताएको छ ।
दूतावासका अनुसार म्यानमारमा रहेका थप ११ जना नेपालीको चाँडै उद्धारका लागि पहल भइरहेको छ भने म्यानमारको म्यावडीमा रहेका विभिन्न अनलाइन ठगी केन्द्रहरूबाट दुई हप्ताको अवधिमा ३८ जना नेपालीहरू समेत गरी विभिन्न २० देशका दुई हजारभन्दा धेरै विदेशी थाइल्याण्ड प्रवेश गरेका हुन्।
ती ३८ जना नेपालीलाई पनि नेपाल फर्काउन थाइल्याण्डका सम्बन्धित निकायसँग समन्वय भइरहेको दूतावासले बताएको छ । साथै दूतावासले श्रम स्वीकृति लिएर मात्रै वैदेशिक रोजगारीमा जान तथा कसैको प्रलोभनमा नपर्न आग्रह समेत गरेको जनाएको छ ।
