दमक, २९ कार्तिक / प्युठानबाट जागिर खोज्ने सिलसिलामा भारत पुग्नु भएका बुबा इन्डियन आयल कर्पोरेसनको जागिरे बन्नुभयो । बुबाको निधनपछि त्यो ठाउँमा जागिर दिने परिपाटी अनुसार जीत सुनार सन् १९७६ मा कर्पोरेसनमा जागिरे बन्नुभयो । कक्षा ९ पढ्दै गर्दा १७ वर्षको उमेरमा डिगबोइ तीनसुकियामा प्राप्त जागिरपछि त्यहाँ बस्दै जाँदा उहाँमा पुस्तक पढ्ने र लेख्ने वानी पर्न थाल्यो । जागिर खाँदै उहाँले कलामा बीए उत्तीर्ण गर्नुभयो ।
४० वर्षको उमेर हुँदा सन् २००० सालबाट कथा र गीत लेख्न थाल्नु भएका उहाँले कथा संग्रह कस्तुरी मृग, एक मुठी निध र किस्ता किस्ता जिन्दगी प्रकाशित गर्नुभयो । ‘कता कता एकान्तमा’ गीति एल्बम समेत प्रकाशनमा ल्याएर आफूलाई साहित्यिक क्षेत्रमा चिनाउन सफल बन्नु भयो । उहाँले नेपालीबाट अंग्रेजी र अंग्रेजीबाट नेपालीमा ८ वटा कृति अनुवाद समेत गर्नुभएको छ ।
जगुराम र सुमित्रा सुनारका सन्तानका रुपमा सन् १९५९ अक्टोबर ११ मा जन्मिनु भएका उहाँ हाल भारतकै सिलगडीमा बसोबास गर्दै जागिरबाट अवकासप्राप्त जीवनलाई सृजनात्मक रुपमा विताइरहनु भएको छ । त्यहाँको सालबारीमा रहेको अलि फरकखाले साहित्यिक अभियानगत संस्था ‘शव्द समय’को संयोजकको भूमिकामा रही साहित्यको प्रभाव विस्तारमा आफ्नो जीवन सुम्पिरहनु भएको छ ।
उहाँले कथामा अभिजमान स्मृति पुरस्कारका साथै मितेरी सम्मान काठमाडौं लगायतबाट सम्मानित र पुरस्कृत बनेर सृजना क्षेत्रमा आफूलाई थप उर्जाशील बनाइरहनु भएको छ । उहाँसँग उज्यालो खबरको कार्यक्रम ‘अनुशीलन’को ५२ औं शृंखलामा गरिएको भलाकुसारी र सृजना प्रस्तुति भिडिओमा हेर्नुहोस् :
