पथरी शनिश्चरे, ४ मंसिर / मोरङको पथरी शनिश्चरेकी १० ऐयाबारीकी २६ वर्षीया विनिता कार्कीले आफूलाई अभिनेत्री तथा मोडेलका रुपमा अघि बढाउँदै हुनुहुन्छ ।
नेपाली चलचित्र उद्योगमा उदाउँदो प्रतिभाका रूपमा आफ्नो स्थान बनाउने प्रयासमा रहनु भएकी विनिता खोटाङमा जन्मिएर बाल्य–कालपछि पथरी शनिश्चरे १० मा बसोबास गर्दै त्यहीँबाट आफ्नो शैक्षिक तथा कलाकारिता यात्रा अघि बढाउनु भयो । श्री केबी मेमोरियल अंग्रेजी बोर्डिङ हाई स्कुल पथरीशनिश्चरे– १० रिगुवाबाट प्रारम्भिक शिक्षा लिनु भएको थियो । उच्च माध्यमिक तह भनें आईजे पायोनियर कलेज, हात्तीवन ललितपुरमा अध्ययन पुरा गरेपछि उच्च अध्ययनका लागि अष्ट्रेलिया पुगी सिड्नीबाट स्नातक सक्नुभयो ।
५.७ फिट उचाइकी विनिता मोडेलिङ र कलाकारिताबाट दर्शकसमक्ष परिचित हुँदै जान थाल्नु भएको छ । आकर्षक व्यक्तित्व, क्यामरासामु आत्मविश्वासी उपस्थिती र स्वभाविक अभिनय क्षमताका साथ उहाँले आफ्नो डेब्यू फिल्म ‘पीआर’ बाट कलाकारितामा सम्भावना खोज्दै हुनुहुन्छ । यसले उहाँको अभिनय करियरलाई नयाँ उचाइमा पुर्याउन महत्वपूर्ण भूमिका खेलेको छ ।
अनुशासित, लक्ष्यकेन्द्रित र मेहनती स्वभावकी विनिता फुर्सदमा किनमेल, यात्रा र विभिन्न परिकारका खाना पकाउनमा रुचि राख्नुहुन्छ । आधुनिक सोच र परम्परागत मूल्यबीच सन्तुलन राख्ने व्यक्तिका रुपमा आफूलाई उभ्याउँदै आउनु भएको छ ।
चलचित्र र मोडेलिङ दुवै क्षेत्रमा आफूलाई निरन्तर उभ्याएर भविष्यमा सफल कलाकार बन्ने उहाँको लक्ष्य छ ।
