काठमाडौं,१५ मंसीर। निर्वाचन आयोगले आगामी फागुन २१ गतेका लागि तोकिएकोे प्रतिनिधिसभा चुनावका लागि १ सय ६८ वटा मतदान स्थल थप गरेको स्रोतले जनाएको छ । आयोगको हिजो बसेको बैठकले १ सय ६८ वटा मतदानस्थल थप गर्ने निर्णय गरेको छ । बैठकले मतदातालाई अपायक परेका, जीर्ण रहेका वा प्रयोगमा नरहेका ९३ वटा मतदानस्थल खारेज गरेको जनाएको छ ।
मतदान स्थल थपघट गरिएसँगै अब देशभर १० हजार ९६७ मतदान स्थल कायम भएको छ भने यसअघि देशभर १० हजार ८९२ मा ७५ वटा मतदानस्थल रहेको थियो ।
आयोगले फागुन २१ गते हुने प्रतिनिधिसभा चुनावमा मौज्दातमा रहेको मतपेटिका पनि प्रयोग गर्ने भएको जनाएको छ । आयोगले अघिल्लो पटकको चुनावमा खरिद गरेर मौज्दात रहेका ९० हजार मतपेटिका प्रयोग गर्ने र नपुग हुने ४५ हजार मतपेटिका खरिद गर्ने निर्णय गरेको छ ।
आयोगले मतपत्र छपाइका लागि अघिल्लो पटक खरिद गरेर मौज्दात रहेको कागज पनि प्रयोग गर्ने भएको छ । आयोगलाई मतपत्र छपाइका लागि ३ सय मेट्रिक टन कागज आवश्यक हुन्छ तर आयोगसँग ५ सय ६६ मेट्रिक टन कागज मौज्दात रहेको स्रोतले जनाएको छ ।
