झापा,१७ मंसिर । झापामा सञ्चालित चिम्नी इँटा उद्योगमा भारतबाट अस्थायी प्रवासी मजदुरहरू परिवारसहित धमाधम नेपाल छिरिरहेका छन्। तर, त्यसरी नेपाल आइरहेका भारतीय अस्थायी प्रवासी मजदुरको यकिन तथ्यांक झापा जिल्लाका प्रहरी, प्रशासनसँग भने छैन। त्यसैकारण, बंगलादेशी तथा रोहिंग्या नागरिक पनि भित्रिन सक्ने जोखिम बढेने भएको छ।
छिमेकी भारतको पश्चिम बंगालबाट बंगलादेशी तथा रोहिंग्या नागरिक अवैध रूपमा नेपाल भित्रिन सक्ने भन्दै सशस्त्र प्रहरीले पछिल्लो समय जिल्लाका सीमा नाकामा उच्च सतर्कता अपनाउन थालेको छ। तर, भद्रपुर र काँकडभिट्टा सीमा नाकामै इँटाभट्टामा काम गर्न आएका भारतीय मजदुरहरूको विवरण संकलन र परिचयपत्र चेकजाँच नगर्दा सुरक्षा निकायलाई समस्या उत्पन्न हुन थालेको छ। भारतबाटै बस रिजाभ गरी नेपाल आउने गरेका भारतीय मजदुरहरू सोझै इँटा उद्योग पुगेर काम गर्न थालेका छन्।
इँटा उद्योगमा काम गरिरहेका भारतीय अस्थायी प्रवासी मजदुरहरूको परिवारसहितको विवरण संकलनको काम भइरहेको सशस्त्र प्रहरी बल नेपाल, नम्बर २ गण हेडक्वार्टर झापाका एसपी तुलबहादुर भण्डारीले जानकारी दिनु भयो।
भारतबाट नेपाल छिर्न सक्ने बंगलादेशी तथा रोहिंग्या नागरिकहरू इँटा उद्योग गएर बसोबास गर्न सक्ने पहिलो सम्भावित स्थान रहेको भन्दै जिल्ला सुरक्षा निकायको बैठकमा छलफल भएको छ । यसबारेमा झापा इँटा उद्योग संघका पदाधिकारीसँग पनि समन्वय र सहकार्य भइरहेको एसपी भण्डारीले बताउनु भयो।
एआइ तस्बीर
