दमक, २१ मंसीर । बंगलादेशमा पछिल्लो समय हिंसात्मक गतिविधि बढ्दै गएको र त्यसको असर भारत हुँदै नेपालसम्म पर्न सक्ने आशंकाबीच पूर्वी नेपालको झापा जिल्लामा सीमा सुरक्षालाई कडाइ गरिएको छ। रोहिङ्ग्या मुसलमानहरू नेपाल प्रवेश गर्न सक्ने सम्भावनालाई मध्यनजर गर्दै सशस्त्र प्रहरीले थप सुरक्षा व्यवस्था मिलाएको हो।
सशस्त्र प्रहरी बल नेपाल नम्बर ३८ रिजर्भ गण हेडक्वार्टर पाडाजुंगीबाट एक सेक्सन सुरक्षाकर्मी टोली झापाको सीमा क्षेत्रमा विशेष निगरानीका लागि परिचालन गरिएको छ। झापामा मेचीनगरदेखि गौरीगञ्जसम्मको झण्डै एक सय ४४ किलोमिटर लामो खुला सीमा क्षेत्र रहेको छ, जुन सुरक्षाको दृष्टिले सधैं संवेदनशील मानिन्छ।
सशस्त्र प्रहरी सहायक निरीक्षकको कमाण्डमा खटिएको आठ जनाको टोली पुरानो मेची पुल, भान्सा खोला, तुर्केनी, नकलबन्दालगायतका खुला र जोखिमयुक्त क्षेत्रमा परिचालन गरिएको छ। यी क्षेत्र हुँदै भारतबाट पैदल नेपाल प्रवेश गर्ने सम्भावना बढी रहने भएकाले विशेष निगरानी गरिँदै आएको सुरक्षा अधिकारीहरूले जनाएका छन्।
सुरक्षामा तैनाथ एक प्रहरी अधिकृतका अनुसार, “मुख्य सडक नाकाबाट नभई जङ्गल, खोल्साखोल्सी र बायाँ–दायाँका बाटो प्रयोग गरेर नेपाल छिर्ने मानिसप्रति हाम्रो विशेष निगरानी हुन्छ। परिचयपत्र जाँच गर्ने, शंकास्पद व्यक्तिलाई तत्काल नियन्त्रणमा लिने काम भइरहेको छ।”
मेची पुलमा कडा चेकजाँच
मुख्य नाका मानिने पुरानो मेची पुलमा भारततर्फबाट नेपाल प्रवेश गर्ने प्रत्येक नागरिकको अनिवार्य परिचयपत्र जाँच गरिँदै आएको छ। शंकास्पद गतिविधि देखिए तत्काल नियन्त्रणमा लिने व्यवस्था मिलाइएको जिल्ला प्रशाषन कार्यालय झापाले जनाएको छ ।
पछिल्लो केही महिनादेखि बंगलादेशमा बढ्दो हिंसा, जातीय तनाव र राजनीतिक अस्थिरताको प्रभाव भारतसम्म देखिन थालेको छ। यही अवस्थाले गर्दा भारत हुँदै नेपालमा अवैध प्रवेश हुन सक्ने सुरक्षा निकायको आकलन छ। त्यसकै आधारमा सीमा क्षेत्रमा सतर्कता अझ कडा बनाइएको हो।
नेपाल–भारतको खुला सिमा दीर्घकालदेखि आवागमनको सहज माध्यम बने पनि अब भने यही खुलापन राष्ट्रिय सुरक्षा चुनौतीको रुपमा उभिन थालेको छ। मानव तस्करी, अवैध प्रवेश, आपराधिक गिरोहको ओहोरदोहोरजस्ता गतिविधि बढ्ने खतरा पनि उत्तिकै बढेको छ।
