दमक, २१ मंसिर / घर परिवारमा शिक्षा र चेतनाको पक्षमा दाइहरुको अगुवाइ थियो । पढ्ने र सृजनात्मक बन्ने पक्षमा परिवारका सबै सदस्य सक्रिय थिए । त्यही वातावरणले परिवारको कान्छो सन्तानका रुपमा रहनु भएकी रेखा सुवेदीलाई सृजनशील यात्रामा अघि बढायो ।
पुष्पलाल सुवेदी र लीला सुवेदीको सन्तानका रुपमा वि.सं. २०३३ साल कार्तिक २१ गते मोरङको बेलबारी १ मा जन्मिनु भएकी रेखामा सानै उमेरदेखि नाँच्ने, गाउनेसँगसँगै कविता लेख्नेमा समेत ध्यान गयो । हुँदै जाँदा जनवादी गीतसंगीततर्फ साँस्कृतिक अभियानमा सामेल भएर समाजका विकृति, विसंगति हटाउने पक्षको लहरमा उहाँको चेतना सामेल भयो । त्यो बेलाको सृजना र साँस्कृतिक अभियानका अग्रज स्थानीय इरनकुमार राईसँगको कार्यक्रमको अभियानमा जीवनको अभियान जोडियो । अनि ०५४ सालमा जनवादी शैलीमा गरिएको उहाँसँगको वैवाहिक सहयात्रापछि समाजमा केही संघर्ष गर्नुपर्यो । संघर्षबाट कत्तिपनि विचलित नभई लगातार आफ्नो कर्ममा लागेर आफूलाई एउटा प्रभावकारी कविका रुपमा उभ्याउन सफल बन्नु भएको छ । २०७९ मा उहाँको कविता कृति ‘नयाँ अनुहार’ प्रकाशित छ ।
भावुक स्वभावकी उहाँभित्र भनें शालिन विद्रोह छ । कविता, गजल, गीत, रुबाई, कथा लेख्ने उहाँले सृजनात्मक अभियानको अगुवाका रुपमा समेत प्रभावकारी गतिविधि गर्दै आउनु भएको छ । पालिकाबाट सृजनाको क्षेत्रमा पनि बजेट विनियोजन गर्नु पर्ने दर्विलो आवाजसहित उहाँको अगुवाईको बेलबारी साहित्य विकास समितिले गतिविधि गर्यो । त्यसलाई बेलबारी प्रज्ञा प्रतिष्ठान बनाएर उहाँकै अगुवाईमा विभिन्न विधाका कार्यक्रमहरु हुँदै आएका छन् ।
सृजना र शैक्षिक चेतनामार्फत समाज रुपान्तरको अभियानमा सामेल उहाँ आफ्नै विद्यालय सगरमाथा इङगलिस स्कुल बेलबारी १ मा अध्यापनरत रहेर विद्यार्थीहरुलाई पनि सृजनशील बनाउने ध्याउन्तेमा हुनुहुन्छ । सुकुना बहुमुखी क्याम्पसमा पनि अध्यापनरत उहाँको सृजना क्षेत्रको योगदानको उच्चमूल्यांकनमा देश विदेशबाट दर्जनौं सम्मान प्राप्त गर्नुभएका छन् । लुगुन साहित्यिक प्रतिष्ठान इटहरीबाट अभिनन्दित बन्नु भएको छ । नेपाल– भारत साहित्य महोत्सव सन् २०१८, कवि विमल गुरुङ स्मृति पुस्तकाय धरान २०६२, साझा प्रकाशन काठमाडौं २०६७, जुही प्रकाशन झापा २०६८, सृजनशील साहित्यिक समाज रुपन्देही २०७०, नवयुग बहुउद्धेश्यीय अध्ययन केन्द्र इनरुवा २०७२, डियर कल्याण साहित्य प्रतिष्ठान इटहरी २०७९, साहित्य सन्ध्या काठमाडौं, डा.नरेन्द्र चापागाईं स्मृति प्रतिष्ठान विराटनगरसहितबाट सम्मानित र पुरस्कृत बनेर आफ्नो सृजनाको आयतन फराकिलो बनाउनु भएको छ । उहाँसँग उज्यालो खबरको ‘अनुशीलन’ कार्यक्रमका लागि गरिएको भलाकुसारी भिडिओमा हेर्नुहोला :
