मोरङ,२३ मंसिर। कोशी प्रदेशका प्रहरी प्रमुख डीआईजी विनोद घिमिरेले मोरङको शान्ति सुरक्षाको अवस्था, प्रहरीको दैनिक कार्यसम्पादन र सेवाप्रवाहको अवस्था बुझ्न सोमबार जिल्ला प्रहरी कार्यालय मोरङको स्थलगत निरीक्षण गर्नु भएको छ।
उहाँको निरीक्षणलाई औपचारिक कार्यक्रमभन्दा पनि प्रहरी संगठनलाई अनुशासित, उत्तरदायी र नागरिकप्रति जवाफदेही बनाउन केन्द्रित प्रयासका रूपमा हेरिएको छ । डीआईजी घिमिरेले जिल्ला प्रहरी कार्यालय मोरङको भवनसँगै अपराध अनुसन्धान शाखा, प्रशासन, महिला तथा बालबालिका सेवा केन्द्र, गुनासो कक्ष, प्रहरी ब्यारेक लगायतको भौतिक पूर्वाधार, कार्यशैली र अभिलेखीकरणको अवस्था अवलोकन गर्नु भएको छ ।
निरीक्षणका क्रममा उहाँले कार्यालयभित्रको रेकर्ड व्यवस्थापन, फाइलिङ प्रणाली, डिजिटल प्रणालीको प्रयोग र सेवाग्राहीसँगको व्यवहारसमेत नजिकबाट नियालनु भएको थियो । निरीक्षणकै क्रममा घिमिरेले मोरङ जिल्ला कोशी प्रदेशको राजधानी अवस्थित जिल्ला भएकाले यहाँको प्रहरी गतिविधि नमुना बन्नुपर्ने बताउनु भएको छ ।
उहाँले दैनिक सेवा प्रवाहमा ढिलासुस्ती, लापरबाही वा गैरजिम्मेवारीपन देखिन नहुने भन्दै प्रहरी अधिकृत र जवानलाई स्पष्ट निर्देशन दिनु भएको छ । ‘विराटनगर र मोरङको सुरक्षा सुदृढ भए मात्रै समग्र प्रदेशमा जनआस्थाको वातावरण सिर्जना हुन्छ’ भन्ने धारणा उहाँले व्यक्त गर्नु भएको छ ।
भारतसँगको खुला सिमानाका कारण मोरङ उच्च जोखिममा रहेको उल्लेख गर्दै डीआईजी घिमिरेले सीमावर्ती क्षेत्रहरूमा कडाइका साथ चेकजाँचको व्यवस्था मिलाउन निर्देशन दिनु भएको छ । चोरी, तस्करी, लागुऔषध कारोबार, अवैध हातहतियारको ओसारपसार जस्ता गतिविधि नियन्त्रणका लागि सूचनामा आधारित कारबाही र नियमित गस्ती बढाउन उहाँले जोड दिनु भयो । सीमावर्ती क्षेत्र, नाका र शंकास्पद आवागमन हुने स्थानमा निगरानी अझ प्रभावकारी बनाउन पनि उहाँले निर्देशन दिनु भएको थियो ।
प्रहरी संगठनलाई अझ पारदर्शी, अनुशासित र जनमुखी बनाउने उद्देश्यसहित गरिएको यस निरीक्षणलाई मोरङमा शान्ति सुरक्षा व्यवस्थापनलाई थप मजबुत बनाउने महत्वपूर्ण कदमका रूपमा हेरिएको छ ।
