दमक, मंसिर २३ । देशमा भ्रष्टाचार, सामाजिक सञ्जाल बन्द र सरकारी दमनको विरोधमा भदौ २३ र २४ गते सुरु भएको जेनजी आन्दोलनले देशभर ठूलो तरंग सिर्जना ग¥यो। आन्दोलनका क्रममा जेनजी युवकयुवती, सुरक्षाकर्मी तथा सर्वसाधारणसमेतको ज्यान गयो। त्यसपछि देशभर सरकारी तथा सार्वजनिक संरचनामा तोडफोड भयो, नेताहरूको निजी सम्पत्तिमा आक्रमण भयो र अन्ततः सरकार परिवर्तनसम्मको स्थिति आयो।
पुराना राजनीतिक दललाई विस्थापित गर्दै जेनजी नेतृत्वमा सुशीला कार्कीको प्रधानमन्त्रीत्वमा सरकार गठन भयो। तर सरकार गठन भएको तीन महिना बितिसक्दा पनि जनअपेक्षा अनुसारको परिवर्तन नआएको भन्दै अहिले जेनजी स्वयं असन्तुष्ट बन्न थालेका छन्। आन्दोलनकारी जेनजीमाथि मात्रै कारबाही केन्द्रित भएको आरोप उनीहरूको छ।
यसैबीच देश विकासका लागि भन्दै फागुन २१ गतेका लागि निर्वाचन घोषणा भइसकेको छ। निर्वाचन आयोगमा नयाँ तथा पुराना दल दर्ता हुन थालेका छन्। यही क्रममा जेनजी आन्दोलनबाट जन्मिएको नयाँ राजनीतिक दल ‘राष्ट्रिय परिवर्तन पार्टी’ ले दमकमा आफ्नो कार्यालय उद्घाटन गरेको छ।
कार्यालय उद्घाटन राष्ट्रिय परिवर्तन पार्टीका केन्द्रीय उपाध्यक्ष अजय कुमार राईले गर्नुभएको हो। कार्यक्रममा जेनजी युनाइटेड सदस्यहरू रिचन वान्तवा, अञ्जना चाम्लिङ, राष्ट्रिय परिवर्तन पार्टीका सदस्य जीवन बस्नेत, पत्रकार तथा जेनजी अभियन्ताहरूको उपस्थिति रहेको थियो।
राष्ट्रिय परिवर्तन पार्टीमा अध्यक्ष राजेश पटेल, ‘जुत्ता’ चुनाव चिह्न बनाएका प्रकाश बोहोरा लगायत आन्दोलनका क्रममा घाइते भएका सयौँ योद्धा सदस्य छन्। सहिद तथा घाइते परिवारका सदस्यहरू समेत पार्टीमा आबद्ध रहेको दाबी पार्टीले गरेको छ। आफूहरू सहिद र घाइतेको प्रतिनिधित्व गर्ने एक मात्र पार्टी भएको पनि उनीहरूको दाबी छ।
