दमक, ६ पुस | दमक नगरभित्रका कलेजमा अध्ययनरत विद्यार्थीहरूलाई अब कलेज पोषाकमै फिल्म हल जान, क्याफे प्रवेश गर्न र धूम्रपानजन्य सामग्री प्रयोग तथा खरिद गर्न रोक लगाइने भएको छ।
कलेज अध्ययन गर्ने विद्यार्थी र यो उमेर समुहका युवाहरु लागुऔषधमा फसेको तथ्यांक समेत निरन्तर वृद्धि भईरहेकोले यसखाले निर्णयलाई प्रमुख निगरानीका साथ कार्यान्वयन गर्न सहमति भएको दमक प्रहरीले जनाएको छ ।
यी विषयमा आज दमकमा सम्पन्न प्रहरी र कलेज प्रशासनबीचको अन्तर्क्रिया कार्यक्रममा गम्भीर छलफल भएको हो।
इलाका प्रहरी कार्यालय दमकका प्रमुख प्रहरी नायव उपरीक्षक किशोर लम्सालका अनुसार विद्यार्थीमा अनुशासन, शैक्षिक मर्यादा र सुरक्षित वातावरण कायम गर्न यस्तो सहकार्य आवश्यक भएको हो।
अन्तर्क्रिया कार्यक्रममा दमक नगरभित्र सञ्चालित सामुदायिक तथा निजी कलेजका प्रमुख, शिक्षक र कलेज सञ्चालकहरूको सहभागिता रहेको थियो।
छलफलमा कलेज समय र पोषाकको मर्यादा, विद्यार्थीको आचरण तथा कलेज वरपरको सामाजिक वातावरण सुधार गर्ने विषयमा जोड दिइएको प्रहरीले जनाएको छ।
