दमक/
‘कुनै ज्यामी काम गर्ने स्थानमा महिला र पुरुषले एकै प्रकारको काम गरिरहनु भएको हुन्छ । त्यो हामीले देखिरहेका छौ । तर ज्याला लिने बेलामा त्यहि काम गरेको पुरुषले बढी महिलाले कम पाउनु हुन्छ । किन ’ अखिल महिला सघं दमक वडा नं २ को कमीटिले सोमबार गरेको कार्यक्रममा दमक नगरपालिकाकी उप प्रमुख गीता अधिकारीले सहभागीसँग यो प्रश्न गर्नु भयो ।
समान काममा असमान ज्याला कहाँ र कसरी दिइन्छ भन्ने कुराको एक दृष्टान्त पेष गरेको भन्दै उहाँले यस प्रकारको असमानता महिलाहरु आफै एकजुट नभएका कारणले भएको बताउनु भयो । उहाँले महिलाले आफ्नो शक्ति कहाँ र कसरी देखाउने भन्ने कुरालाई ख्याल गर्ने हो भने यस प्रकारको विभेदको अन्त्य हुने धारणा राख्नु भयो । एकै प्रकृतिको काम गर्दा समान ज्याला र सेवा पाइएन नी भनेर अहिले सम्म महिलाहरुले प्रश्न गर्ने हिम्मत नगरेका कारणले पनि अहिले सम्म विभेदनै सहिरहनु परेको उहाँको भनाई छ ।
महिलालाई शशक्तिकरण बनाउने हो भने सिपमा दक्ष बन्नु पर्छ । सिप बराबरको काम र उद्यम गर्नु पर्छ । न्यूनतम पनि आफुलाई आवश्यक पर्ने साधारण खर्च मात्रै आफैले कमाउन थाल्ने हो भने परिवारमा हुने विभेद हट्ने उहाले बताउनु भयो । तर त्यसकालागि म के सिक्ने र के गर्ने भन्ने कुरा चाहि आफुमा हुनुपर्नेपनि उहाँको भनाई थियो । यसकालागि दमक नगरपालिकामा आफुहरु जनप्रतिनिधी भएर जाने बित्तीकै महिला लक्षीत विभिन्न कार्यक्रमहरु बनाएको उहाँले सुनाउनु भयो । ‘दमकका महिला उद्यम गर पहिला ’ भन्ने नारा नै ल्याएर महिलामाथी हुनेगरेको विभेद हटाउने अभियान नगरपालिकाको तर्फबाट सुरु भइसकेको उहाँले जानकारी दिनुभयो ।
अनेम सघं दमक २ नं वडा कमिटिले विभिन्न सास्कृतीक तथा महिलाहरुलाई सम्मान पनि गरेको थियो । कमिटीले १५ जना जेष्ठ आमाहरुलाई छाता दिएर सम्मान गरेको हो । साथै महिला मुक्तिसँग सम्बन्धीत विभिन्न गीत तथा कविताहरु पनि कार्यक्रममा प्रस्तुत गरिएको अनेम सघं वडा नं २ कि इन्चार्ज सुभेच्छा अधिकारी सापकोटाले जानकारी दिनुभयो ।
कार्यक्रममा अनेम सघंकी केन्द्रिय सदस्य शारदा सापकोटा प्रमुख अतिथी रहनु भएको थियो । नगरकी उप प्रमुख गीता अधिकारी, अनेम सघं प्रदेश १ कमिटि सदस्य भक्तादेवि दाहाल, अनेम सघंकी झापा जिल्ला कमिटी सचिवालय सदस्य लिला ढुङ्गेल लगायत अन्य विभिन्न महिला नेतृ तथा एमाले पार्टिका जिल्ला तथा नगर स्तरिय नेताहरुको पनि उपस्थित रहेको थियो ।
