दमक, २३ पुष । कोशी प्रदेश सरकारका नवनियुक्त आन्तरिक मामिला तथा कानून मन्त्री इन्द्रमणी पराजुलीले प्रदेशमा सुशासन स्थापना नै आफ्नो पहिलो र मुख्य प्रतिबद्धता भएको बताउनु भएको छ ।
रेडियो किङ एफ एमको कार्यक्रम सत्य संवादमा बोल्दै मन्त्री पराजुलीले अब प्रदेश सरकार भाषण र औपचारिकतामा सीमित नहुने,जनताले प्रत्यक्ष अनुभूति गर्ने काममै केन्द्रित हुने स्पष्ट पार्नु भएको हो ।
उहाँले विधि र कानुनको पालना गराउने विषयमा कुनै सम्झौता नहुने बताउँदैकानुन सबैका लागि समान रूपमा लागू हुने व्यवस्था गर्न मन्त्रालय सक्रिय रहने उल्लेख गर्नुभयो। मन्त्री पराजुलीका अनुसार सरकारी कामकारबाहीमा मितव्ययिता र पारदर्शितालाई प्राथमिकता दिइनेछ। अनावश्यक खर्च कटौती गर्दै नतिजामुखी योजनामा बजेट खर्च गरिने पनि उहाँले बताउनु भएको छ ।
प्रदेशमा सुरक्षा व्यवस्थापनका सन्दर्भमा संघीय सरकारले अझै प्रहरी समायोजन नगर्दा चुनौती देखिएको उल्लेख गर्दै भन्नु भयो ‘त्यसको समाधानका लागि संघ सरकारसँग दृढ पहल गर्ने प्रतिबद्धता व्यक्त गर्दछु । ’
उहाँले प्रदेश सरकारको प्रभाव र विश्वसनीयता बढाउन अधिकतम परिणाम देखिने काममार्फत प्रदेशको औचित्य र प्रभावकारिता प्रमाणित गर्ने लक्ष्य रहेको बताउनुभयो। ‘जनताले अब भाषण र आश्वासन होइन, कामको परिणाम खोजिरहेका छन् । नागरिकले प्रत्यक्ष महसुस गर्ने सेवा प्रवाहमै मन्त्रालय केन्द्रित रहने छ । ’ उहाँले स्पष्ट पार्नुभयो ।
