दमक ९ माघ । पाँच–छ वर्ष अगाडि दमकको अवस्था सम्झिँदा आज पनि धेरैको मन भारी हुन्छ। धुलाम्मे सडक, अव्यवस्थित बजार, जताततै भीड र दुर्घटनाको डर। सडकमा हिँड्न गाह्रो, सास फेर्न पनि कठिन। तर समय फेरिएसगै दमकको चमक पनि फेरीएको छ । दमक बजार अहिले पूर्वि नेपालकै सफा र सुन्दर नगर बनेको छ ।
आजको दमक बजार क्षेत्रमा धुलाम्मे सडक छैनन्। पिच गरिएका सडक, सफा वातावरण र व्यवस्थीत बजारले दमकको मुहार नै बदलिएको छ। दमक–५ का स्थानीय ओम सेढाइ चार–पाँच वर्षअघिको अवस्था सम्झँदै भन्नु हुन्छ पहिले सडकको धुलोले हिँड्नै सकिँदैन थियो। तर अहिले पिच सडक बनेका छन्, बजार सफा छन्, दमक सुन्दर देखिन थालेको छ।
यस्तै अनुभव सुनाउनु हुन्छ सभिता भण्डारी गौतम। उहाँका अनुसार पहिले अव्यवस्थित बजारका कारण तरकारी किन्न निकै समस्या हुन्थ्यो। अहिले भने बजार व्यवस्थीत भएकाले दैनिक किनमेल सहज भएको छ।
दमक–६ का कोपिला पौडेल पनि विकासको परिवर्तन स्पष्ट देखिएको बताउनु हुन्छ। सडकको राम्रो व्यवस्थापनले धुलोबाट मुक्ति मिलेको छ। आवतजावत सजिलो भएको छ। अरू ठाउँको तुलनामा दमकमा विकासको गति तीव्र भएको उहाँको भनाइ छ।
सरकारले गरेको विकासका कामले आज दमक ‘सुन्दर दमक’ बन्दै गएको छ। सडकका दुवै किनारामा रोपिएका हरियाली बोटबिरुवाले वातावरण थप आकर्षक बनेको छ।पहिले सधैँ भिडभाड हुने सडकमा बाटो काट्नै समस्या हुन्थ्यो। तर अहिले आकाशे पुल बनेपछि पैदलयात्रीलाई ठूलो राहत मिलेको छ। सडक, बजार, वातावरण र यातायात व्यवस्थापनमा आएको सुधारलेदमकका नागरिकको दैनिक जीवन सहज बनेको छ।
