दमक, १० माघ/ जति अभाव भएपनि मनले चाँहि नपढ्ने कुरातर्फ कहिल्यै सोच्दै सोचेन । अर्थात जन्मजात पढ्ने, लेख्ने कुरामा मन गइरह्यो । फलस्वरुप अभावलाई चिर्दै पढ्ने, पढाउने र लेख्ने कामले नै स्थापित गरिछाड्यो यज्ञप्रसाद दहाल अर्थात यज्ञ परिश्रमीलाई ।
काशीनाथ र श्यामकलाका आठ छोरामध्ये खन्तरे छोराका रुपमा वि.सं. २०२२ माघ ५ गते पाँचथरको मौवामा जन्मिनु भएका परिश्रमी हाल मोरङको उर्लाबारी ५ मा बसोबास गर्दै आउनु भएको छ ।
२०४५ साल मंसिर १ गते कालिका मावि टाँडीबाट शिक्षक सेवामा प्रवेश गरेपछि उहाँलाई जीवन सहज बनाउँदै जान मद्धत पुग्यो । २०६४ सालबाट राधिका माध्यामिक विद्यालय उर्लाबारी ६ मा सरुवा भएर त्यहाँ १८ वर्ष शिक्षण गरेपछि ३७ वर्षे कार्यावधि पुरा गरेर उमेर हदका कारण अनिवार्य अवकास पाउनु भएको छ ।
उहाँले विद्यालयमा पाठ्यक्रम मात्र पढाउनु भएन, सृजना, इमान्दारिता, सरलता, मिजास र कर्तव्यबोधको अग्लाई सिकाउनु भयो । राधिका माविमा त विद्यार्थीलाई सृजनशील बनाउन राधिका साहित्य समाज निर्माण गरेर प्रोत्साहन भरिरहनु भएको छ । त्यहाँ आफ्नै खर्चमा महाकवि लक्ष्मीप्रसाद देवकोटाको कर्धकदको प्रतिमा स्थापित गरिदिनु भएको छ ।
भावुक र चेतन मनका कारण सृजनासँगको उहाँको जन्मजात नै जोडिएको नाता साहित्य लेखनको ४५ वर्षपछि कविता संग्रह ‘राराको लीला’मा एकमुष्ठ संग्रहित भइ जुनीजुनीको चिनो बनेर बसेको छ । कविता, कथा, संस्मरण, गजल र विचारहरूका एक एक पुस्तकका पाण्डुलिपी तयारी अवस्थामा छन् ।
प्रचारबाट टाढै रहन रुचाउने उहाँ सृजना प्रवद्र्धनको गहन मर्ममा आफ्नो रुची जोडेर नेपाली साहित्य समाज उर्लाबारीको नेतृत्व लिनुकासाथै विभिन्न सामाजिक काममा सक्रिय हुनुहुन्छ ।
नेपाल राष्ट्रिय शिक्षक संगठन, राधिका मावि, राधिका साहित्य समाज, परोपकार सेवा केन्द्र, मनोहर जनता मावि मिक्लाजुङलगायतका संघ संस्थाबाट साहित्य र शिक्षा क्षेत्रमा सम्मानित बनेर समाजका लागि सृजनकर्मको प्रोत्साहनमा आफूलाई निरन्तर उभ्याइरहनु भएको छ । उहाँसँग उज्यालो खबरको ‘अनुशीलन’ कार्यक्रममा भएको भलाकुसारीको भिडिओ हेरौं :
