अमेरिका, १७ माघ / अन्तर्राष्ट्रिय नेपाली गीतकार संघ (आइएनएलए) ले आफ्नो दोस्रो सम्मेलनका अवसरमा सात नेपालीभाषी स्रष्टालाई सम्मानित गर्ने भएको छ ।
स्थानीय साहित्यिक संस्था साहित्य कला संगमको संयोजनमा आगामी मार्च २९ मा अमेरिकाको ल्यांकास्टर, पेन्सल्भेनियामा आयोजना गर्ने सम्मेलनमा स्रष्टा सम्मानसहित विभिन्न सत्र, सांगीतिक प्रस्तुति, साहित्यिक संवाद तथा स्रष्टाबीच अनुभव आदान–प्रदानका कार्यक्रमहरू समावेश गरिने संघका महासचिव रन खड्काले जनाउनु भयो ।
सम्मेलनको प्रमुख आकर्षणका रूपमा गीत–संगीत क्षेत्रमा उल्लेखनीय योगदान पुर्याएका सात जना स्रष्टालाई विशेष सम्मान प्रदान गरिनेछ । सम्मानित हुने स्रष्टाहरूमा दिनेश अधिकारीलाई आइएनएलए ज्ञानेन्द्र गदाल गीत सम्मान प्रदान गरिनेछ । नेपालतर्फबाट पुरू लम्साललाई गीतकार सम्मान, तृप्ति खड्कालाई संगीत सम्मान र यसोदा पराजुलीलाई गायन सम्मान प्रदान गरिनेछ ।
त्यसैगरी, डायस्पोरा श्रेणी अन्तर्गत अमेरिकाबाट सबु गदाल कार्कीलाई डायस्पोरा गीतकार सम्मान, डम्बर खापुङ सुब्बालाई डायस्पोरा गायन सम्मान तथा अगम गुरुङलाई डायस्पोरा लोक संगीत सम्मान प्रदान गरिने संघले जनाएको छ ।
सम्मेलनमा नेपाली गीत–संगीत, साहित्य र कलाको संरक्षण तथा प्रवद्र्धनलाई केन्द्रमा राखिने संघका संस्थापक अध्यक्ष डा. हरि उप्रेतीले जनाउनु भयो । उहाँले सम्मेलनले विश्वभर छरिएर रहेका नेपाली सर्जकहरूलाई एउटै साझा मञ्चमा जोड्ने विश्वास व्यक्त गर्नुभयो । विश्वभर रहेका नेपाली गीतकार, संगीतकार तथा साहित्यिक सर्जकहरूलाई एउटै मञ्चमा समेट्नु, नेपाली कला र संस्कृतिको प्रवद्र्धन गर्नु तथा मौलिक सांस्कृतिक पहिचानलाई नयाँ पुस्तामा हस्तान्तरण गर्नु संघको उद्धेश्य रहेको उल्लेख गर्नुभयो ।
यसअघि आप्रवासी गीतकार नेपाली संघको नामबाट गतिविधि सञ्चालन गर्दै आएको संस्थाले सन् २०२६ देखि कानुनी रूपमा “अन्तर्राष्ट्रिय नेपाली गीतकार संघ (आइएनएलए)”का रूपमा दर्ता भई आफ्ना कार्यक्रमहरू अघि बढाएको अध्यक्ष उप्रेतीले जानकारी दिनुभयो । कोष संकलन र संगठन सुदृढीकरणलाई प्राथमिकतामा राखिएको उल्लेख गर्दै उहाँले संगठनलाई आर्थिक रूपमा दिगो बनाउने लक्ष्य रहेको सुनाउनु भयो । ‘आइएनएलएले ५०१(अ)(३) सार्वजनिक परोपकारी संस्थाका रूपमा मान्यता पाउनु ठूलो उपलब्धि हो । यसले पारदर्शी र प्रभावकारी रूपमा समुदायका लागि काम गर्न सहज बनाएको छ,” डा. उप्रेतीले भन्नुभयो ।
