दमक, २२ माघ। दमकको कृष्णमन्दिरबाट सुरु भएर पिङडाडा, धराने टोल हुँदै सातमारा–आम्बाडी पार गर्दै इटहरा सडकसम्म पुग्ने यो बाटो कहिल्यै पनि सहज थिएन। स्थानीयका लागि यो सडक यात्रा होइन, संघर्ष जस्तै थियो। धुलो उडेर आँखै खोल्न नसकिने अवस्था, बर्खा लागेपछि हिलोमा फस्दै लड्दै हिँड्नुपर्ने बाध्यता। स्कुल जाने बालबालिका ढिला पुग्थे, बिरामी बोकेर अस्पताल लैजान गाह्रो पथ्र्यो, किसान र व्यापारीका लागि त यो सडक दैनिक समस्या बनेको थियो। तर अहिले दृश्य नै फेरिएको छ।
सडक कालोपत्रे भइसकेको छ, दुवैतर्फ नाली (ड्रेन) बनेका छन्। पानी जम्दैन, धुलो उड्दैन। सवारी साधन सहजै गुड्छन्। स्थानीयले छोटो समयमा गन्तव्य पुग्न थालेका छन्। विद्यालय, स्वास्थ्य संस्था र बजारसम्म पुग्न अब कुनै झन्झट छैन। यो सडकले केवल यात्रा सजिलो बनाएको छैन, यो क्षेत्रको आर्थिक र सामाजिक गतिविधिमा समेत नयाँ ऊर्जा थपेको छ।
स्थानीय विरेन राय परिवर्तन आफ्नै आँखाले देखेको अनुभव सुनाउँदै भन्नुहुन्छ,“यो सडक धेरै पुरानो हो। यही बाटो भएर हामी धेरै ठाउँ जान्थ्यौं, तर हालत निकै खराब थियो। धुलो र हिलोकै कारण धेरै दुःख भोग्नुपथ्र्यो। केपि ओलीको नेतृत्वमा सरकार बनेपछि मात्रै यो सडक बनेको हो। आज हिँड्दा गर्व लाग्छ, अब आवतजावत साँच्चिकै सहज भएको छ।”
उहाँजस्तै विरी लाल धिमालको मनमा पनि सन्तोष झल्किन्छ। “पहिले यो सडक कच्ची थियो, पानी परेपछि हिँड्नै नसकिने हुन्थ्यो। स्कुटर, साइकल त परको कुरा, पैदल हिँड्दा पनि फसिन्थ्यो। तर अहिले यो सडक पिच भएको छ । छोटो समयमा गन्तव्य पुग्न पाइन्छ, कामकाज गर्न सजिलो भएको छ।”
स्थानीयका अनुसार यस्ता आधारभूत पूर्वाधार नै विकासको मेरुदण्ड हुन्। सडक बनेपछि व्यापार बढेको छ, विद्यार्थीको पढाइ सहज भएको छ र स्वास्थ्य सेवामा पहुँच पनि मजबुत बनेको छ।
अब आगामी फागुन २१ गते हुने निर्वाचन नजिकिँदै गर्दा स्थानीयबासीको अपेक्षा झन् स्पष्ट देखिन्छ। उनीहरू भन्छन्, भाषणभन्दा काम चाहिन्छ। समस्या बुझ्ने, समाधान गर्ने र विकासलाई निरन्तरता दिने नेतृत्व चाहिन्छ। सडकजस्तै प्रत्यक्ष जीवन परिवर्तन गर्ने योजनामा ध्यान दिने व्यक्ति नै सरकारको नेतृत्वमा पुग्नुपर्छ।
कृष्णमन्दिरदेखि इटहरासम्मको यो सडक आज केवल कालोपत्रे बाटो होइन, विकास अघि बढिरहेको प्रमाण हो। देशले समृद्धि चाहन्छ भने विकास बुझ्ने र काम गरेर देखाउने नेतृत्व आवश्यक रहेको यस क्षेत्रका नागरिकले सन्देश दिन समेत खोजेका छन् ।
