सोलुखुम्बु — तीन वर्षपछि खुम्बु क्षेत्रमा पर्यटकको आगमनले यहाँका व्यवसायीमा खुसीयाली छाएको छ । ‘विदेशी पर्यटक आउन थालेका छन्, अब तीन वर्षदेखि बन्द हाम्रो होटलको ढोका खुलेको छ,’ लुक्लाका होटल व्यवसायी रामकुमार तामाङले भने ।
नाम्चेका होटल सञ्चालक पनि उत्साहित छन् । ‘व्यवसाय ठप्प थियो, अब पर्यटक आउन थालेपछि आशा पलाएको छ,’ व्यवसायी छिमिकाल्देन शेर्पाले भने ।
पर्यटकीय सिजन सुरु भएसँगै खुम्बु क्षेत्रमा पर्यटकको चहलपहल बढ्न थालेको छ । कोभिड महामारी मत्थर भएसँगै नेपाल आउने विदेशी पर्यटकको संख्यामा वृद्धि भएको हो । मार्च १ देखि पर्यटन क्षेत्रको स्प्रिङ सिजन सुरु भएयता खुम्बुमा मात्रै ७ सय ५० पर्यटक भित्रिएका हुन् । १५ दिनको अवधिमा साढे ७ सय विदेशी पर्यटक भित्रिनु पर्यटन क्षेत्रका लागि सकारात्मक संकेत रहेको व्यवसायीहरूको प्रतिक्रिया छ ।
पछिल्लो समय दैनिक सयको हाराहारीमा पर्यटक खुम्बु भ्रमणमा आउन थालेका छन् । ‘सोमबार मात्रै १ सय २० विदेशी भित्रिए अनि ३५ बाहिरिए,’ सगरमाथा प्रदूषण नियन्त्रण समितिका उपाध्यक्ष लामाकाजी शेर्पाले भने । अहिले पदयात्राका लागि मात्रै पर्यटक आएका हुन् । मार्च अन्तिमदेखि पर्वतारोहणको टोली आउन सुरु गर्ने उपाध्यक्ष शेर्पाको भनाइ छ । कोभिडपछि खुम्बु क्षेत्रमा आउने आन्तरिक पर्यटकको संख्यामा पनि वृद्धि भएको छ ।
पछिल्लो साता लुक्ला विमानस्थलमा हवाई उडान संख्या पनि बढेको छ । ८ हजार मिटर अग्ला ३ हिमाल रहेको खुम्बु क्षेत्रको एक मात्र प्रवेशद्वार लुक्ला विमानस्थलमा अहिले प्रतिदिन ३० भन्दा बढी उडान भइरहेको विमानस्थलका प्रमुख द्वारिका अछामीले जानकारी दिए ।
