झापा : मानव बेचबिखन तथा ओसार पसार मुद्दाका तीन फरार अभियुक्त चार वर्षपछि पक्राउ परेका छन् ।
पक्राउ पर्नेमा साबिक तोपगाछी गाविस-६ हाल कमल गाउँपालिका-४ निवासी ४४ वर्षीया सीता केरुङ सम्बाहाम्फे, सोही ठाउँका ५० वर्षीय इन्द्र सम्बाहाम्फे र ४३ वर्षीय हंसराज केरुङ रहेको प्रहरी कार्यालय झापाका डिएसपी वसन्त पाठकले जानकारी दिए ।
झापा जिल्ला अदालतले उनीहरूलाई २०७४ साल असार २८ गते मानव बेचबिखन तथा ओसार पसार मुद्दामा कैद सजाय तोकेको थियो। अदालतले तीनै जनालाई सात वर्ष ६ महिना कैद सजाय, एक लाख जरिवाना र पीडितलाई ५० हजार क्षतिपूर्ति भराउनु पर्ने तोकेको छ ।
अदालतले गरेको फैसलादेखि नै फरार भएका उनीहरूलाई प्रहरी कार्यालय झापाबाट खटिएका प्रहरी टोलीले चैत २ गते पक्राउ गरेको हो। पक्राउ परेका उनीहरूलाई अदालतमा उपस्थित गराई कैद भुक्तानका लागि झापा कारागार पठाउने तयारी भइरहेको डिएसपी पाठकले बताए।
